sport
BT I BTRy
Nu, što nam usim rabić? Nu, niama ŭ našaj televizii hrošaj na narmalnuju pracu. Na adzinaccać vychadaŭ ATN štodnia hrošy jość, a na sport niama. Dziaržava ŭ asobie svajho šefa lubić chakiej, ale jašče bolš lubić pałochać narod BTRami. Tamu na vajskovyja vučeńni ŭ Miensku hrošaj nie brakuje, a na tranślacyju čempijanatu śvietu z Sankt-Pieciarburhu nie staje. Voś i prychodzicca televizijščykam zapuskać u efir novy reklamny rolik: «Padajcie, kali łaska, kaho šče nie dadušyli, moža paciešymsia za našych...» Abo spadziavacca, što ŭ «zasiekach baćki» niešta zastałosia, i jon u apošni momant ščodraj rukoju padzielicca.
A tut jašče j futboł źnianacku pačaŭsia. U pieršym tury duel monstraŭ «Biełšyna»—BATE, kruty matč u Bieraści «Dynama»— «Słavija», ale ničoha hetaha my nia bačym. Na babrujskim stadyjonie niejkija prablemy, a Bieraście tak daloka, što BTšnikam jechać tudy zadoraha. A svajoj pierasoŭnaj telestudyi tam niama. Voś i pakazvajuć hulni ŭ Miensku, niejkija «Tarpieda»— «Lakamatyŭ», i jašče dziakuj Bohu, što ŭvohule niešta pakazvajuć.
Toje ž z Alimpijadaj. Prosta dziva, što nam choć niešta pakažuć: adkryćcio-zakryćcio dy finały pa baraćbie j himnastycy. Moža j na viesłavańnie naskrabuć. Praŭda, bajusia, z-za taho nia ŭbačym nia toje što tenisnaha matču na Kubak Devisa z Švajcaryi, ale j futbolnaha adboračnaha matču čempijanatu śvietu z Polščy.
A samaje cikavaje, što ŭ telebačańnia j nie pavinny być hrošy na pakaz spabornictvaŭ. Dakładniej, hrošy musiać być, ale ŭsie papularnyja tranślacyi mieli b apłočvać fundatary za reklamu! Ale heta nie pra nas. U nas niama fundataraŭ, u nas jość vašyvyja błochi, spekulanty j pierakupščyki. U nas ža kali ŭ kaho baksy jość, jon nikomu pra heta nia skaža. Inakš spačatku jahonyja roliki prakruciać, a potym samoha padatkavymi inspekcyjami — u baranoŭ roh. «Dziakuj, buślik, ale adkul u ciabie hrošy?!» Tak što finansaŭ dla BT moža padkinuć tolki adna firma — tavarystva ź nieabmiežavanaj biezadkaznaściu ŭ Čyrvonym domie. Kali ad BTRaŭ zastanucca.
Tamu hladziećmiem mehaseryjały «Vystup pravadyra ŭ Pałacie» dy «Selektarnaja narada». Z dublavańniem na radyjo. Reklamu na takija mylnyja opery nia znojdzieš, zatoje jany j vydatkaŭ nie patrabujuć. Dva-try aperatary dy čałaviek za pultam — i pałova efirnaha dnia poŭnaja. A ŭ volny čas možna papravić reklamnyja zastaŭki dla rasiejskich kanałaŭ na prośbu niejkaha vice-premjera. Zamiest «reklama ŭ Biełarusi» — «riekłama v Biełoruśsii». Što ŭžo j robiać na NTV.
Arciom Łukjanovič
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam14
Kamientary