AB USIM PATROCHU

 AB USIM PATROCHU

Naviny za tydzień

Rujnavańnie kryžoŭ

Kala vioski Parečča Słonimskaha rajonu byŭ zrujnavany kryž, ustalavany siabrami spartova-patryjatyčnaj arhanizacyi “Kraj” u honar Michała Vałoviča – biełaruskaha patryjota j revalucyjanera, aktyŭnaha ŭdzielnika nacyjanalna-vyzvolnaha paŭstańnia 1830—31 h. Na dumku “krajoŭcaŭ”, da hetaha bluźnierstva prykłali ruku miascovyja ŭłady ŭ asobie namieśnika staršyni rajvykankamu Tarsunova dy staršyni sielsavietu Padreckaha, jaki za kolki dzion pierad tym padbuchtorvaŭ žycharoŭ Parečča razburyć kryž.

I heta nie adzinkavy vypadak. Tak, u śniežni 1999 h. u miastečku Vyzna byŭ źniščany kryž, jakim arhanizacyja “Kraj” ušanavała pamiać hierojaŭ Słuckaha paŭstańnia 1920 h. Viasnoj 2000 h. źnikła pamiatnaja doška Tadevušu Kaściušku ŭ vioscy Siachnovičy. A zusim niadaŭna ŭ Harodni biazbožniki vykrali kryž, jaki vierniki-patryjoty pastavili na miescy ŭzarvanaj savietami Fary Vitaŭta.

Novy bieraściejski japiskap

Kiraŭnikom Bieraściejskaj i Kobrynskaj japarchijaŭ pryznačany archimandryt Safroni, jaki da hetaha byŭ namieśnikam mužčynskaha manastyra ŭ Ladach na Mienščynie. Chiratonija adbudziecca ŭ Miensku 4 lutaha. Naradziŭsia ajciec Safroni ŭ vioscy Hiaršony pad Bieraściem, jakraz tamaka, dzie ŭ 1648 h. zabili śviatoha Afanasija Filipoviča.

Kudzinava mohuć zvolnić

Advakat palitviaźnia Ŭładzimiera Kudzinava spadziajecca vyzvalić svajho klijenta. Novy kryminalny kodeks praduhledžvaje miakčejšaje pakarańnie za pravaparušeńnie, jakoje inkryminavali Kudzinavu (jamu dali 7 hadoŭ, jakija potym skaracili na 2 hady pa amnistyi). U Mienski abłasny sud užo nakiravali adpaviednuju skarhu. Kali jaje zadavolać, Kudzinaŭ vyjdzie na volu.

Zabaroniena palić

Z 1 studzienia va ŭsich bolnicach zabaroniena palić – i chvorym, i lekaram. Ministerstva achovy zdaroŭja rychtuje ŭkaz, jaki zabaronić paleńnie i ŭ inšych ustanovach – kulturnickich, navučalnych, navukovych. Zvyčku palić maje siońnia 45% biełarusaŭ, 42 čałavieki ŭ krainie pamirajuć štodzień z-za chvarobaŭ, vyklikanych tytuniom.

Rasiejcy mianiajuć karespandentaŭ

NTV dy RTR mianiajuć svaich ułasnych karespandentaŭ u Biełarusi. Na miesca Alaksandra Kałpakova karespandentam NTV pryjedzie niejki z Varoniežu. Nievysoka ž cenicca Biełaruś u rasiejskim žurnalisckim raskładzie. Na RTR, dzie pracavała biełaruska Alena Łukaševič, pakul nieviadoma, chto pryjedzie. Ale peŭna što ŭžo nie biełarus.

Śmiełaja dyplamatka

3 studzienia a pałovie na vośmuju viečara ŭ Maskvie napali na druhoha sakratara pasolstva Biełarusi ŭ Rasiei Maryju Marozavu. Niechta vychapiŭ u jaje sumačku z dyplamatyčnaj kartkaju, klučami ad kvatery dy 150 rasiejskimi rublami. Adbyłosia heta kala ambasady Etyjopii. Jana stała adbivacca i nie dała ababrać siabie da nitki. Uzbudzili kryminalnuju spravu.

Most u Viciebsku

U Viciebsku pabudavali novy most daŭžynioju 530 m cieraz Łučosu. Zaraz žycharam spalnych mikrarajonaŭ budzie našmat jamčej dabiracca da adnoj z najbujniejšych pramysłovych zonaŭ miesta.

Złodziej zahinuŭ ad toku

4 studzienia za 1,5 km ad Naraŭlanaŭ znajšli mierćviaka. Čałaviek vyrašyŭ narezać elektryčnaha drotu, kab potym jaho pradać, ale pierabłytaŭ niadziejnuju liniju elektrapieradačy z susiedniaj, mahutnaściu 110 kV. Raniej niebaraku ŭžo sudzili za prodaž kalarovaha metału.

Aleś Kudrycki

Uhandyjska-biełaruski kanflikt

Uhandyjskim parlamentaram, što raśśledujuć padazronuju ździełku 1996 h. pa zakupcy hielikopteraŭ i tankaŭ u Biełarusi j Baŭharyi dla vojska hetaj afrykanskaj dziaržavy, nie ŭdałosia atrymać biełaruskija vizy.

Piaciom apazycyjnym deputatam na čale z Krysam Mudułam admoviła ŭ vydačy vizaŭ biełaruskaje pasolstva ŭ Londanie. Parlamentary, što pa 10 dniach znachodžańnia ŭ Eŭropie viarnulisia na radzimu, chacieli pravieryć ceny i padrabiaznaści damovy, pavodle jakoj Biełaruś pradała Ŭhandzie dva nieadramantavanyja hielikoptery pa košcie adramantavanych.

Muduła zajaviŭ, što analahičny dakład pa baŭharskim śledzie budzie hatovy 20 studzienia. Što da niaŭdačy ŭ Biełarusi, dyk jon skazaŭ, što, “mahčyma, asoby, zamiašanyja ŭ tuju spravu, prykłali tutaka ruku. My źbirajemsia atrymać bolš faktaŭ. Ale ceły miesiac my marna sprabavali naładzić aficyjnyja kantakty ź biełaruskimi ŭładami”.

Pavodle New Vision,
Uhanda

Praŭda žyćcia

Zalacieli...

Jašče nichto tak nia ździekavaŭsia ź ideolaha Łukašenki Ŭ.Zamiatalina, jak anhłamoŭnaje Internet-vydańnie Russia Today. Na jahonym sajcie źmieščanaje paviedamleńnie pad zahałoŭkam Belarus to Fly Iraq (Biełaruś palacić u Irak), dzie raspaviadajecca, jak toj damoviŭsia ŭ Bahdadzie pra rehularnyja avijarejsy tudy ź Miensku. Sa spasyłkaj na irackaje radyjo paviedamlajecca, što ŭ Irak lotaŭ “Uladzimir Zalyatalin”. Chacia niekatoryja čynoŭniki ŭžo daŭno nazyvajuć jaho “piervyj zamietalin hłavy administracii”.

Źmicier Kalaradzki

Pamior Janka Zołak

30 śniežnia 2000 hodu a šostaj hadzinie viečara ŭ špitali śv.Piatra ŭ horadzie Ńju-Branśviku (ZŠA) pamior biełaruski paet Janka Zołak (Anton Daniłovič). Pražyŭ 88 hadoŭ. Z 1944-ha hodu ŭ emihracyi. Aktyŭny ŭdzielnik biełaruskaha ruchu na čužynie. Redahavaŭ časopis “Biełaruskaja dumka”. Vydaŭ 2 tamy svaich tvoraŭ u ZŠA i zbornik vybranaha “Viatryska z radzimaj krainy” ŭ Biełarusi. Lubiŭ Baćkaŭščynu, maryŭ pamierci na rodnaj ziamli. Pachavany na biełaruskich mohiłkach u Saŭt-Ryvery, Ńju-Džersi, ZŠA. Viečnaja pamiać.

Ł.P.