Z usich staron

Z usich staron

Čarhovy pracoŭny adpačynak Miaśnikoviča, 
jakoha paśla vybaraŭ moža źmianić Sivakoŭ

Z 8 da 10 lipienia adbyvajecca vizyt kiraŭnika Administracyi prezydenta Michaiła Miaśnikoviča ŭ Kuvejt. U skład biełaruskaje delehacyi ŭłučanyja pradstaŭniki kancernaŭ “Biełenerha” i “Biełnaftachim”.

Ciaham vizytu planujecca padpisać mižuradavyja pahadnieńni ab uzajemnaj abaronie investycyjaŭ, paźbiahańni padvojnaha padatkaabkładańnia, a taksama pratakoł u Kuvejckim fondzie arabskaha ekanamičnaha raźvićcia. Pavodle aficyjnych źviestak, tavarazvarot miž našymi krainami za pieršyja try miesiacy 2001 h. skłaŭ 1218 tys. dalaraŭ (vyklučna biełaruski ekspart).

Vizyt u Kuvejt, jak i niadaŭni vizyt premjera Ŭładzimiera Jarmošyna ŭ Liban, u čynoŭnickich kołach nazyvajuć pracoŭnymi adpačynkami pierad majučymi adbycca prezydenckimi vybarami. Źviazanaja ź vizytam u Kuvejt časovaja adsutnaść Miaśnikoviča ŭ Miensku moža mieć i ŭnutrypalityčnaje značeńnie.

Jahony pieršy zastupnik Uładzimier Zamiatalin źjaŭlajecca staršyniom biełaruska-irackaje kamisii pa handlova-ekanamičnym supracoŭnictvie j adstojvaje ŭ Miensku intaresy Bahdadu. Jahonaja zamiežnapalityčnaja dziejnaść nie zaŭsiody vitałasia ŭ MZS.

Zamiatalina nazyvajuć adnoj z perspektyŭnych kandydaturaŭ na pasadu pasła ŭ Bahdadzie. Ale paśla prezydenckich vybaraŭ.

Mahčymaja i vysyłka samoha Miaśnikoviča pasłom kudy-niebudź. Nie sakret, što Zamiatalin faktyčna vyjšaŭ z padparadkavańnia svajho niepasrednaha načalnika Miaśnikoviča j zamachvajecca na pasadu kiraŭnika Administracyi. Tak što jon całkam moža skarystacca ŭ svaich karyślivych intaresach adsutnaściu svajho šefa. Ale bolš šancaŭ źmianić Miaśnikoviča paśla vybaraŭ maje inšy namieśnik hałavy Administracyi — Jury Sivakoŭ. Pad markaj inspekcyi ačolvanaja im hrupa supracoŭnikaŭ Administracyi praciahvaje jeździć pa rehijonach Biełarusi, zamacoŭvajučy suviazi ź miascovymi orhanami ŭłady j praviarajučy pa zadańni kiraŭnika dziaržavy nadziejnaść kadraŭ, jakija ŭvažajucca vyłučencami Miaśnikoviča.

Ryčard Burštym

Pucin, mahčyma,
nie pryjedzie

Na 25 lipienia pryznačanaja sustreča Łukašenki, Kučmy i Pucina ŭ Viciebsku na “Słavianskim bazary” — čarhovy etap pieradvybarnaj kampanii PPRB. Ale, jak paviedamili krynicy z vybarčaha štabu M.Maryniča, jaki na minułym tydni byccam by jeździŭ u Maskvu, mahčyma, Pucin u Viciebsk nie pryjedzie.

R.Ja.

U Biełaruś?

Papa Jan Pavał II 24—26 vieraśnia naviedaje Armieniju, zajechaŭšy pierad tym u Kazachstan. Nahoda dla vizytu ŭ Armieniju — uračystaści, što adbuducca ŭ tym krai z pryčyny 1700-ch uhodkaŭ abviaščeńnia chryścijanstva dziaržaŭnaj relihijaj Armienii. Na ŭračystaści zaprasili j maskoŭskaha patryjarcha Aleksija II, jaki admaŭlajecca-tki sustrecca ź Janam Paŭłam. Krynicy, blizkija da biełaruskaha biskupatu, paviedamlajuć, što Papa vielmi chacieŭ by naviedać i Biełaruś. Jany nie vyklučajuć, što taki vizyt moh by adbycca ŭžo naleta. Zastajecca dadać umovu, pra jakuju jany maŭčać: kali ŭ Biełarusi źmienicca palityčnaja sytuacyja.

Siarhiej Rak

Na šlachu
da vertykali

Kiraŭniki Pavołžža admaŭlajucca ad častki svaich uładnych paŭnamoctvaŭ na karyść centralnaje ŭłady, pra što j pišuć u kalektyŭnym liście Pucinu, jaki maje źjavicca na dniach. Jany prosiać anulavać damovy miž pravincyjami i centram ab raźmiežavańni paŭnamoctvaŭ, bo, maŭlaŭ, patreby ŭ ich bolš niama i termin ich dziejańnia pieravažna vyjšaŭ. Zastałasia tolki adna prablema — isnavańnie hetkich damovaŭ zamacavana ŭ rasiejskaj Kanstytucyi.

Zaniapad cerkvaŭ

Śviata Kiryły j Miatoda dy ŭhodki śmierci Jana Husa – adzinyja, aprača Kaladaŭ i Vialikadnia, relihijnyja śviaty ŭ Čechii, abvieščanyja vychodnymi dniami. 5 lipienia ŭ paŭdniovamaraŭskim Vielahradzie adbyłasia imša ŭ pamiać śviatych, jakija ŭ 863 h. prynieśli čecham chryścijanstva. Ale sabrałasia na jaje tolki 30 tys. čałaviek. Niašmat!.. Prablemy českaje katalickaje carkvy vyjavili i vyniki apošniaha ŭsieahulnaha pierapisu. Za 10 apošnich hadoŭ viernikaŭ u Čechii pamienšała na 1,3 młn asobaŭ. U 1991 h. kala 40% čechaŭ nazyvała siabie biazbožnikami, u 2001 h. hety pakaźnik dasiahnuŭ 58%. Najbolšyja straty mieŭ ryma-katalicki kaścioł, dzie kolkaść viernikaŭ pamienšała ad 4 da 2,7 młn. asobaŭ. Viernikaŭ pahublali i Evanhieličnaja carkva (140 tys.), i Husickaja carkva (96,4 tys.).

Vyhady Eŭraźviazu

Čechija paśla ŭvachodžańnia ŭ Eŭraźviaz štohod budzie atrymoŭvać z Bruselu kala $1700 młn. datacyjaŭ, a sama budzie płacić u sajuzny skarb $660 młn.

S.R.

Arkuš – u Vilniu

Połacki piśmieńnik Aleś Arkuš, hałoŭny redaktar časopisu “Kałośsie”, časova pierabraŭsia na žycharstva ŭ Vilniu. Mo, zastaniecca tam i na stała.

S.Ch.

List u redakcyju

Pišu da vas z Aŭstralii

Piša da vas Michaś — z Aŭstralii.

U Aŭstralii zaraz vosień i pačatak zimy, samyja pryhožyja i pryjemnyja pory hodu: ciopłyja soniečnyja dni, temperatura ŭ Sydnei 12—21 hradus. U siaredzinie zimy (lipień — pačatak žniŭnia) byvaje i “vielmi chałodna”, bo časam 3—4 hradusy ranicaj.

Jość u nas taksama biada, chvaroba, jakaja zaviecca staraść. Balšynia nacyjanalna śviadomaha biełaruskaha hramadztva ŭžo paśla 70 hadoŭ, a pryrostu amal niama, tak što budučynia vyhladaje nia vielmi cikava. Ale ž nie pachilajem hałovaŭ, moža zdarycca cud.

Michaś Łužynski, Hiłdfard