Futboł 2101 hodu

Biełaruś praz 100 hadoŭ

Futboł 2101 hodu

9 žniŭnia 2101 hodu. Alaska. Finał čempijanatu śvietu pa futbole: Biełaruś—Astravy Kuka 0:0. Idzie piataja dadatkovaja chvilina sustrečy, abaronca astraŭlanaŭ zavalvaje ŭ svajoj štrafnoj napadnika biełarusaŭ — biassprečnaje penalci. Da “kropki” padychodzić lepšy ihrok turniru, praŭnuk Ramana Vasiluka, Bohuś Vasiluk. Udar... Hoł! Ura! Praź jakoje imhnieńnie hučyć finalny śvistok hałoŭnaha sudździ sustrečy. Biełaruś — čempijon!!!

Natoŭpy ludziej strenuć hierojaŭ-futbalistaŭ u Nacyjanalnym aeraporcie stalicy, jaki nosić imia Ŭładzimiera Karatkieviča. Vilenčuki i hości stalicy z kvietkami ŭ rukach pavinšujuć ich ź pieramohaj. Premjer-ministar Mikałaj Radzivił sa ščyrymi słovami padziaki vystupić pierad ludźmi. Darečy, mienavita z dapamohaj kamandy jon spadziajecca pierakanać parlament nadać krainie status kanstytucyjnaj manarchii na čale z kniaziem.

Paśla ŭračystaściaŭ u stalicy futabalistaŭ čakaje turne pa haradach, dzie žyvuć biełarusy.

U Biełastoku kamanda naviedaje kultavy rok-fest “Basovišča” imia Lavona Volskaha. U Navahradku i Ružanach, la muroŭ nanova adbudavanych zamkaŭ, adbuducca rycarskija festy, jakija źbirajuć šlachieckich vajaroŭ z usioj Eŭropy. Našyja hulcy voźmuć udzieł u bajoch rycaraŭ. U Horadni ž futbalistaŭ prymie Papa Rymski, pieršy papa — biełarus pa nacyjanalnaści, jaki specyjalna dziela hetaha adviedaje Radzimu. Hety Papa — vialiki prychilnik futbołu. Paśla Horadni na šlachu hulcoŭ paŭstaje Barysaŭ, stary futbolny centar. Skončycca hety vajaž pa krainie ŭ Połacku.

Ale śviatočnyja dni minajuć i viartajucca zvyčajnyja šeryja budni: futbalisty trenirujucca, rok-muzyki zapisvajuć muzyku, medyki ratujuć žyćci ludziam, fermery pracujuć na ziamli, paspality biełarus čakaje, kali narešcie paštarka pryniasie “Našu Nivu”.

Biełaruś žyvie pa starym vialikalitoŭskim pryncypie: daŭniny nia rušym, naviny nia ŭvodzim. I tolki bujnyja pieramohi našych spartoŭcaŭ parušajuć spakoj biełaruskich ziemlaŭ: natoŭpy ludziej vychodziać na vulicy haradoŭ pad bieł-čyrvona-biełymi ściahami i zaŭsiody žyvym pokličam: “Žyvie Biełaruś! Žyvie viečna!”.

Źmicier Pankaviec, Kastryca (Barysaŭščyna)

Novy prajekt “Našaje Nivy”

2101 hod. Jakoj budzie Biełaruś praz 100 hadoŭ? Jakoj budzie dziaržava i jaki dziaržaŭny ład? Jakimi buduć harady? Jaki horad budzie stalicaj Biełarusi? Jakimi miežy krainy? Što biełarusy buduć jeści? Jakimi buduć biełaruskija hrošy? Jakim transpart? Jakimi srodki masavaj infarmacyi? Jakaja litaratura budzie čytacca? Ci zastanucca teatry? Jakija imiony buduć samymi papularnymi? Jakimi stanuć lasy i reki? Ci možna budzie kupacca ŭ zabrudžanych siońnia aziorach? Jakija źviary źniknuć, jakija novyja raśliny zaviaducca? Što budzie z čarnobylskaj zonaj? U jakich cerkvach buduć malicca ludzi? Što jany viedaćmuć pra 2001 hod? Što budzie z nami?

Štotydnia — fantazii pra budučyniu Viečnaj Biełarusi, ese, prahnozy i futuralahičnyja artykuły ŭ rubrycy “Biełaruś praz 100 hadoŭ”. Z hetaha vyjdzie cełaja kniha! Čakajem Vašych dopisaŭ. Budziem zahadvać.