Naviny haspadarskija

Z usioj krainy

10% akcyjaŭ “Azotu”, “Palimiru”, “Naftanu” i “Biełšyny” prapanujuć rasiejskim investaram napačatku. Takoje rašeńnie papiarednie pryniaŭ “Biełnaftachim”. Hetaja dziaržaŭnaja kampanija taksama abvieściła, što choča pradać jašče niekalki pradpryjemstvaŭ — połackaje ab‘iadnańnie “Škłovałakno”, Homielski chimičny zavod, Haradzienski mechaničny zavod, Barysaŭski zavod plastmasavych vyrabaŭ. Pakupnikoŭ na ich pakul niama.

Da 230 młn. dalaraŭ uzrasła zapazyčanaść Biełarusi za haz. Heta na 43 młn. bolej, čym u pačatku hodu. “Hazprom” prapanoŭvaje addać jamu za heta 20% akcyjaŭ “Biełtranshazu”. Naš urad pahadžajecca pradać tyja akcyi tolki za hrošy.

Padatki ad zdačy kvateraŭ zaćvierdzili ŭ stalicy. Z tych, chto zdaje 1-pakajoŭku, u hod buduć brać 12 bazavych vieličyniaŭ, za 2-pakajoŭku — 24, 3-pakajoŭku — 36, 4-pakajoŭku — 48, za 5 i bolej pakojaŭ — 60.

Udvaja pavialičyć terytoryju stalicy maje Mienharvykankam da 2030 h. Pašyrać horad planujuć u zachodnim kirunku. Zhody na pašyreńnie, praŭda, pakul nie daje abłvykankam, bo ŭ takim razie horad “zachapaje” najlepšyja ziemli Mienskaha rajonu.

Try novyja prajekty pačynajucca ŭ volnaj ekanamičnaj zonie “Miensk”. Biełaruska-rasiejskaje tavarystva “Vostraŭ” budzie vyrablać tut pramysłovyja ladoŭni, amerykanskaje pradpryjemstva “Pryncim-Pak” — upakoŭku, a tavarystva “Biełbrykpram” — karbanatnuju cehłu. Pad novyja prajekty pryjdzie 6 młn. dalaraŭ investycyj i stvoracca 270 pracoŭnych miescaŭ.

ZBORY ZA PARKOŬKU ŭ specyjalna abstalavanych miescach źmienšanyja. Ciapier pahadzinny zbor za parkoŭku da 20 chvilin składzie 0,03 bazavaj vieličyni (BV), da hadziny — 0,06 BV, unočy (z 19 da 9 hadzin) — 0,01 BV. Miesiačny abanement za karystańnie parkoŭkaj budzie kaštavać 3 BV, kali płaciš hatoŭkaj, i 4 — pa bieznajaŭnym raźliku. Miesiačnaje rezervavańnie miesca na parkoŭcy abydziecca ŭ 6 BV.

Avijarejs z Horadni ŭ Biełastok naładziać z červienia. Rejs budzie rabić samalot An-2, palot budzie ciahnucca paŭhadziny.

Try tydni moža nie pracavać biełaruskaja haspadarka. Pa źviestkach Minekanomiki, u pačatku krasavika zapasy niepradadzienaj pradukcyi skłali 76% ad siaredniaha pakaźniku vytvorčaści za miesiac. Adnačasova 47,7% pradpryjemstvaŭ mieli straty.

1,7% SKŁAła inflacyja za pieršyja try tydni krasavika. Ahułam sioleta ceny ŭzraśli ŭžo na 14,7%, tady jak Nacbank planavaŭ rost 20—27% na ŭvieś hod.

CHLEB PADARAŽEŬ na 10%. Adhetul cana na biełyja bułki stanie svabodnaj.

Abaviazkovaje strachavańnie budzie dazvolena ažyćciaŭlać tolki dziaržaŭnym strachavym kampanijam. Hetkuju pastanovu rychtuje Ministerstva finansaŭ. Kali jaje prymuć, bolšaść strachavych kampanij zbankrutuje.

Na 7—12 dzion zatrymali pensii ŭ krasaviku. Ministerstva pracy šukaje kredyty, kab spłacić zapazyčanaści pensijaneram da Vialikadnia.

16,5 młn. kredytu atrymaje śvietłahorskaje “Chimvałakno” ad Kuvejckaha fondu arabskaha ekanamičnaha raźvićcia na rekanstrukcyju vytvorčaści polieternaha tekstylu. Spłačvać budzie ciaham 20 hadoŭ.

1,3 młn. dalaraŭ vydatkuje biudžet Miensku na budoŭlu futbolnaha manežu na pr.Mašerava.

dziaržava pierastanie finansavać ź biudžetu budoŭlu abjektaŭ sackultbytu, paśla taho jak u čarnobylskaj zonie dabudujuć balnicy j škoły, pačatyja za savieckim časam. Datavacca budzie tolki žyllo. Takuju zajavu zrabiŭ Łukašenka 26 krasavika ŭ Čačerskim rajonie.

Strajkavali pracaŭniki AAT “Vorša” (były zavod “Lehmaš”). Na pradpryjemstvie kryzys zbytu, bo aršanskija šviejnyja mašynki pierastali kuplać u Rasiei, na jakuju aryjentavanaja vytvorčaść. U pačatku krasavika kalektyŭ užo strajkavaŭ, i ŭłady za dva dni znajšli hrošy na vypłatu zarobku. Ciapierašni strajk “prafilaktyčny”. Rabočyja patrabavali ad dyrektara harantyjaŭ vypłaty zarobku z 25 krasavika, a toj nie adkazaŭ. Jašče biesterminovy strajk maje na mecie apiaredzić namier administracyi adpravić kalektyŭ u vymušany adpačynak na pieršuju pałovu traŭnia.

U pryvatyzacyi “Biełnaftachimu” mohuć uziać udzieł zachodnija investary. “U adroźnieńnie ad rasiejskich kampanij zachodnija vielmi aściarožnyja. — kaža prezydent kampanii Ivan Bambiza. — Jany nikoli nie abjaŭlajuć pra siabie, pakul nie prychodziać na fondavy rynak i nie kuplajuć niejki pakiet akcyjaŭ”.

Siaržuk Ivanoŭski, M.Č.

Pokładu patrebnaja kroŭ

Stan abaroncy Kurapataŭ 24-hadovaha Alesia Pokłada, jaki 11 dzion znachodzicca ŭ reanimacyi apiokavaha centru Mienskaj bolnicy chutkaj dapamohi, pa-raniejšamu ciažki. U chłopca vysokaja temperatura, jamu štodzień robiacca pieralivańni plazmy. Alesiu zrabili aperacyju nekratamii — vydaleńnia źmiarćviełych tkanak. Ciapier jamu patrebnaja donarskaja kroŭ. Zdavać jaje mohuć paŭnaletnija asoby ź mienskaj prapiskaj, daviedkami pra fluarahrafiju i stan zdaroŭja z ukazańniem chvarobaŭ za apošni hod. Hrupa kryvi moža być lubaja. Prymajuć jaje ŭ adździaleńni pieralivańnia kryvi balnicy chutkaj dapamohi z 8.30 da 11.30.