pa-za hulnioju
Mahčyma ŭsio!
U 1966-m brazylcy, pieramožcy dvuch pieršynstvaŭ śvietu zapar, raźvitvalisia z čempijanatam u Anhlii paśla startavaha etapu. Analahičnaja sytuacyja paŭtaryłasia sioleta: nie zabiŭšy ŭ Paŭdniovaj Karei nivodnaha miača, čempijony śvietu francuzy pa troch matčach pakinuli mundyjal. Taktyčnyja chiby ŭ francuskaj hulni hetym razam nie kampensavalisia fartam: štanhi j papiaročki ci raz ratavali supiernikaŭ. Senehalcy j datčanie ŭ matčach z čempijonami byli bolš skancentravanyja, pakazali lepšy kamandny futboł — i zastalisia hulać dalej. Kankurencyi im nie składzie — i heta taksama sensacyja — zbornaja Arhientyny. U apošnim matčy hrupavoha turniru kamanda vialikich futbalistaŭ nia zdoleła pierahulać racyjanalny, niebiaśpiečny padčas razyhrańnia standartnych stanoviščaŭ švedzki kalektyŭ. Arhientyncy znoŭ nia zdoleli zamianić na hały svajo daminavańnie na poli. Z “kvartetu śmierci” — hrupy “F” — zmahańni ŭ 1/8 finału praciahnuć švedy j anhielcy: u subotu skandynavaŭ čakaje matč z zbornaju Senehału, zapačatkavalniki ž futbołu zhulajuć z datčanami. Favarytami bukmejkieraŭ — paśla vybyćcia zbornych Francyi j Arhientyny — zastajucca najpierš brazylcy, hišpancy, anhielcy dy italjancy. Pieršym i druhim chapiła dvuch matčaŭ, kab harantavać sabie miesca ŭ płej-ofach.
Pakul zarana padvodzić vyniki zbornych Japonii, Paŭdniovaj Karei j ZŠA: apošnija hulni ŭ hrupach “D” i “H” projduć u piatnicu. Ale zdabytych hetymi kamandami pieramoh davoli ŭžo, kab pryznać, što dystancyja ŭ klasie pamiž hrandami eŭrapiejskaha j paŭdniovaamerykanskaha futbołu, z adnaho boku, i ŭsimi inšymi, z druhoha, niaŭchilna skaračajecca. Tolki najstražejšaja dyscyplina j prahmatyčnaja taktyka dazvolili trochrazovym čempijonam śvietu niemcam adoleć kamerunski barjer. U matčy Kamerun—Niamieččyna ŭstanoŭleny rekord mundyjalaŭ: hišpanski sudździa Antonijo Lopes Ńjeta pakazaŭ hulcom 16 žoŭtych i 2 čyrvonyja kartki. I nia stolki brudny byŭ toj futboł, chutčej — duža ščodry na kary vyjaviŭsia sudździa. Surjozny sudziejski skandał na čempijanacie zdaryŭsia pakul tolki adnojčy: brytanski arbitar Hrehiem Poł supolna z dackim pamočnikam Jensam Łarsenam zachavali pieramožny dla zbornaj Charvatyi lik u matčy z italjancami, u vyniku ŭskładniŭšy apošnim šlach z padhrupy.
Z nabližeńniem matčaŭ stadyi płej-of cikavaść da čempijanatu ŭ śviecie raście. Aficyjny sajt mundyjalu (www.fifaworldcup.com) užo staŭsia najbolš paśpiachovym spartovym internet-prajektam u historyi: kolkaść naviedańniaŭ pierasiahnuła paŭmiljardnuju adznaku. Tym časam, dla balšyni z nas asnoŭnym aknom na futbolnaje pieršynstvo zastajecca BT ź jaho chraničnym deficytam prafesijnych kamentataraŭ. Taki deficyt vielmi adčuvaŭsia ŭ časie apošniaj zimovaj Alimpijady, adčuvajecca jon i ciapier. Maładyja supracoŭniki spartovaj redakcyi ŭ chodzie tranślacyjaŭ vučacca kamentavać futboł i havaryć pa-biełarusku. Pakul vychodzić nia duža — presny, leksyčna ŭbohi, hramatyčna błytany “bieła-ruski” kamentar. Słovy, pry jakich trymaje adno dramatyzm karcinki.
Juraś Bušlakoŭ
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?
Kamientary