dziaržaŭny interas
Karalaviec
Naziraješ za raźvićciom eŭrapiejska-rasiejskaha kanfliktu vakoł Karalaŭca, i časam robicca kryŭdna, što rasiejcy až nastolki nia ličać nas niezaležnym subjektam mižnarodnaha prava, a eŭrapiejcy z hetym moŭčki pahadžajucca. Prynamsi, ź ich boku tak i nie prahučała naturalnaje pytańnie pra miežy Rasiei, da jakich jana źbirałasia “ciahnuć” svoj “transpartny kalidor”. Pry tym, što na kožnaj mapie vidać: Karalavieččynu ad rešty Rasiejskaj Federacyi adździalajuć dźvie dziaržavy. Ale nia budźma tut roblena ździŭlacca — my ŭsie cudoŭna viedajem, kamu persanalna dziakavać za hetkuju pahardu i što rabić, kab jaje pazbycca paśla!
Važniej inšaje: možna peŭna skazać, što rasiejskija patrabavańni buduć adkinutyja i praz paru hadoŭ Karalavieččyna kančatkova zrobicca dla Rasiei “adrezanym kavałkam”. Z kožnym hodam suadnosiny tych, chto kaliści źjechaŭsia ŭ ačyščanuju ad niemcaŭ “Kalininhradzkuju vobłaść”, i tych, chto na hetaj ziamli naradziŭsia dy nia viedaje inšaj Radzimy, źmianiajucca na karyść apošnich. Projdzie zusim niašmat času — i Rasiei ciažka budzie štości supraćstavić idejam ab aŭtanomii j navat dziaržaŭnaj samastojnaści hetaha łapika ziamli, z usich bakoŭ atočanaha Eŭraźviazam. A kali novaje dziaržaŭnaje ŭtvareńnie ŭsio ž uźniknie, potym nie spatrebicca šmat času, kab jano stałasia častkaj abjadnanaj Eŭropy: nadta ž vialikaj budzie ŭ tym zacikaŭlenaść i jahonych žycharoŭ, i ichnych susiedziaŭ.
U vypadku ŭvachodžańnia Karalavieččyny ŭ Eŭraźviaz 80 tysiač karalavieckich biełarusaŭ dałučacca da 250 tysiač polskich i 58 tysiač litoŭskich (hramadzianie Eŭropy z 2004 h.). Kolkaść “našych” eŭrahramadzianaŭ pieravalić tady za 400 tysiač (z ulikam biełaruskich emihrantaŭ u Zachodniaj i Siaredniaj Eŭropie dy ichnych naščadkaŭ). Hetkaja pavažnaja dyjaspara, kali jaje jak śled zarhanizavać, budzie ŭ stanie hodna reprezentavać “biełaruski faktar” va ŭsich surjoznych spravach Sajuzu. Tamu pačynać naviazvać kantakty dy imknucca ŭpłyvać na palityčnyja schilnaści našaha budučaha eŭrapiejskaha avanhardu treba ŭžo siońnia.
Ihar Lalkoŭ
Ciapier čytajuć
Mužčyna ŭ minskim mietro łapaŭ dziaŭčat, z vyhladu padletkaŭ, i pakazvaŭ im pachabnyja žesty. Jaho zatrymali14
Kamientary