дзяржаўны інтэрас
Каралявец
Назіраеш за разьвіцьцём эўрапейска-расейскага канфлікту вакол Караляўца, і часам робіцца крыўдна, што расейцы аж настолькі ня лічаць нас незалежным суб’ектам міжнароднага права, а эўрапейцы з гэтым моўчкі пагаджаюцца. Прынамсі, зь іх боку так і не прагучала натуральнае пытаньне пра межы Расеі, да якіх яна зьбіралася “цягнуць” свой “транспартны калідор”. Пры тым, што на кожнай мапе відаць: Каралявеччыну ад рэшты Расейскай Фэдэрацыі аддзяляюць дзьве дзяржавы. Але ня будзьма тут роблена зьдзіўляцца — мы ўсе цудоўна ведаем, каму пэрсанальна дзякаваць за гэткую пагарду і што рабіць, каб яе пазбыцца пасьля!
Важней іншае: можна пэўна сказаць, што расейскія патрабаваньні будуць адкінутыя і праз пару гадоў Каралявеччына канчаткова зробіцца для Расеі “адрэзаным кавалкам”. З кожным годам суадносіны тых, хто калісьці зьехаўся ў ачышчаную ад немцаў “Калінінградзкую вобласьць”, і тых, хто на гэтай зямлі нарадзіўся ды ня ведае іншай Радзімы, зьмяняюцца на карысьць апошніх. Пройдзе зусім няшмат часу — і Расеі цяжка будзе штосьці супрацьставіць ідэям аб аўтаноміі й нават дзяржаўнай самастойнасьці гэтага лапіка зямлі, з усіх бакоў аточанага Эўразьвязам. А калі новае дзяржаўнае ўтварэньне ўсё ж узьнікне, потым не спатрэбіцца шмат часу, каб яно сталася часткай аб’яднанай Эўропы: надта ж вялікай будзе ў тым зацікаўленасьць і ягоных жыхароў, і іхных суседзяў.
У выпадку ўваходжаньня Каралявеччыны ў Эўразьвяз 80 тысяч каралявецкіх беларусаў далучацца да 250 тысяч польскіх і 58 тысяч літоўскіх (грамадзяне Эўропы з 2004 г.). Колькасьць “нашых” эўраграмадзянаў пераваліць тады за 400 тысяч (з улікам беларускіх эмігрантаў у Заходняй і Сярэдняй Эўропе ды іхных нашчадкаў). Гэткая паважная дыяспара, калі яе як сьлед зарганізаваць, будзе ў стане годна рэпрэзэнтаваць “беларускі фактар” ва ўсіх сур’ёзных справах Саюзу. Таму пачынаць навязваць кантакты ды імкнуцца ўплываць на палітычныя схільнасьці нашага будучага эўрапейскага авангарду трэба ўжо сёньня.
Ігар Лялькоў
Цяпер чытаюць
Скандал у полацкай школе: маці сцвярджае, што яе сына збілі на трэніроўцы па дзюдо — так хлопца «выхоўваў» трэнер11
Каментары