Biurakraty proci vytvorcaŭ

Biurakraty proci vytvorcaŭ

Pradpryjemstvy Pružanščyny praciviacca pieradačy
pad kantrol rasiejskaha kapitału

U chutkim časie pradpryjemstvy Pružanščyny mohuć pierajści ŭ padparadkavańnie AAT “Biełavieskaja charčovaja kampanija”, jakoje planujuć stvaryć pry aktyŭnym udziele rasiejskaha kapitału. Hetaja ideja pryjšła ŭ hałavu Ivanu Mazuru, jaki raniej žyŭ u tych krajoch, a ciapier uznačalvaje rasiejskaje pradpryjemstva “Rasnaftahazbud”. Miascovyja ŭłady — abiedźviuma rukami “za”, a voś zamožnyja pradpryjemstvy vahajucca ci aktyŭna piarečać stvareńniu “pružanskaj imperyi”.

Aficyjny prajekt stvareńnia “Biełavieskaj charčovaj kampanii” nadrukavany sioleta 3 vieraśnia ŭ “Narodnaj haziecie”. Jaho raspracavała inicyjatyŭnaja hrupa, u jakuju ŭvachodziać Vasil Dadałka, siabar ekspertnaj rady pa ekanamičnym raźvićci pry Saŭminie, Dźmitry Hałubkoŭ, pradstaŭnik maskoŭskaha “Daviernaha j investycyjnaha banku”, dy Alaksandar Miedavy, vice-prezydent rasiejskaha banku “Avanhard”.

Prajekt praduhledžvaje zasnavańnie “vertykalna intehravanaj ahrapramysłovaj kampanii”, jakaja abjadnaje ŭsie pradpryjemstvy Pružanščyny, źviazanyja z charčovaj vytvorčaściu. U adździele ekanomiki pružanskaha rajvykankamu patłumačyli tak: u kampaniju mohuć uvajści ŭsie pradpryjemstvy rajonu, nie abaviazkova tyja, jakija zajmajucca vyrabam charčavańnia. Hałoŭnaja ŭmova — kab heta byli akcyjanernyja tavarystvy. Spačatku siem najbujniejšych pradpryjemstvaŭ pavinny pieradać “Biełavieskaj charčovaj kampanii” kantrolnyja pakiety svaich akcyjaŭ, a potym kałhasy dy saŭhasy Pružanščyny pierarobiać na akcyjanernyja tavarystvy i taksama dałučać da “imperyi”. Kampanija budzie “kiravać kiraŭnictvam” — vyrašać, kolki hrošaj musić atrymlivać administracyja paduładnych pradpryjemstvaŭ, kaardynavać ich materyjalnaje zabieśpiačeńnie dy prodaž pradukcyi.

Sumnieŭnaja dzialba

Pa-za napyšlivymi słovami kancepcyi vymaloŭvajecca sapraŭdny sens prajektu. Jaje stvaralniki ličać, što pradpryjemstvy Pružanščyny pracujuć nieefektyŭna z-za taho, što imi drenna kirujuć. Našmat lepš, pavodle kancepcyi, imi budzie kiravać “Biełavieskaja charčovaja kampanija”. U vyniku, ahulnyja vydatki na vytvorčaść źmienšacca na 30%, a prybytki pavialičacca ŭ 2 razy za pieršyja 2—2,5 hodu. Abhruntavańnie tamu — niejkija “mierkavańni ekspertaŭ”. Planujucca taksama “reklamnyja kampanii ŭ medyjach”, pryciahnieńnie investaraŭ, u pieršuju čarhu z Rasiei.

Systema raźmierkavańnia akcyjaŭ novaj kampanii prosta ŭnikalnaja: pradpryjemstvy, jakija ŭvachodziać u jaje skład, skidajuć svaje kantrolnyja pakiety ŭ ahulnuju kuču, bo 56,2% tak ci jnačaj atrymlivaje rasiejski bok, a pružanskim pracaŭnikam dastajecca vartaja žalu rešta. Skład patencyjnych rasiejskich investaraŭ taki: 27,2% akcyjaŭ addajuć nieviadomym fizyčnym asobam, AAT “Karparatyŭnaja finansavaja investycyjnaja kampanija”, zarehistravanaje tolki 4 miesiacy tamu ŭ Maskvie, budzie trymać 16%, a “Ahrapramysłovy bank “Kaciaryninski” — filija rasiejskaha banku, zarehistravanaha ŭ niejkim Cimašeŭsku, — budzie vałodać 13% akcyjaŭ. Cikava, što “Kaciaryninski” zajmaje ŭ rejtynhu rasiejskich bankaŭ 1238-je miesca z 1309. Taki skład investaraŭ asablivaha davieru nie vyklikaje.

Smačny kavałačak

Najbolš paśpiachovaje miascovaje pradpryjemstva — AAT “Pružanski małočny kambinat”. Uvachodzić u kampaniju kambinat nie žadaje. Jahony statutny fond (pa stanie na 2000 h. bieź pieraacenki) składaje 1 miljard 413 młn. rubloŭ, a statutny fond “Biełavieskaj charčovaj kampanii” — tolki 32 młn. Adnak kambinatu prapanavali tolki 6,4% akcyjaŭ. Da taho ž, licenziju na davierčaje kiravańnie, adpaviedna z pastanovaj dziaržkamitetu pa kaštoŭnych papierach, vydajuć tolki tamu pradpryjemstvu, jakoje nia mienš za try hady pracuje na rynku kaštoŭnych papieraŭ (a “Biełavieskuju charčovuju kampaniju” jašče navat nie stvaryli) i statutny fond jakoha nie pieravyšaje statutnaha fondu pradpryjemstvaŭ, jakimi buduć kiravać.

“Našaje pradpryjemstva — heta smačny kavałačak dla Rasiei. I jana žadaje prybrać nas da ruk”, — kaža Viktar Donik, namieśnik dyrektara Pružanskaha małočnaha kambinatu. “Karonnaja” pradukcyja kambinatu — ćviordy syr. Sioleta vyrabili ŭžo 1891 tonu syru. Na pružanski daskanały “Halandzki” daŭno źviarnuli ŭvahu biełaruskija hurmany. Taksama na kambinacie honiać z małočnaj syrovatki śpirt, robiać ź jaho alkaholnyja napoi. Pradukcyja pradpryjemstva ŭvohule karystajecca dobrym popytam.

“Kampanija” abiacaje kambinatu vychad na rasiejski rynak, ale jahonaja pradukcyja daŭno pradajecca i ŭ Maskvie, i na Sachalinie. “Našto mianiać šyła na myła?” — pytajecca sp.Donik. Jon nie vyklučaje j takoha varyjantu raźvićcia padziejaŭ: “Biełavieskaja charčovaja kampanija” atrymlivaje kredyt u niejkim banku Rasiei pad zakład akcyjaŭ pradpryjemstvaŭ (atrymańnie takich kredytaŭ — adzin z punktaŭ prajektu stvareńnia kampanii). Akcyi pieradajucca ŭ jakaści zakładu, i kredyt nie viartajecca. Paśla hetaha rasiejski bank aŭtamatyčna robicca ŭładalnikam adpaviednych biełaruskich pradpryjemstvaŭ. U najhoršym vypadku ŭsia Pružanščyna zrobicca votčynaju zamiežnaj finansavaj struktury.

Kali hałoŭnaja meta kampanii — dapamahčy pružanskim pradpryjemstvam raźvivacca, dyk čamu b nie abjadnać u jaje tolki dobraachvotnikaŭ? Dyrekcyja pružanskaha małočnaha kambinatu prapanavała stvaryć “Biełavieskuju charčovuju kampaniju” bieź jaho ŭdziełu, ale adkazam byŭ cisk z boku miascovych uładaŭ. Pružanski małočny kambinat farmalna padparadkoŭvajecca Bieraściejskaj vobłaści, ale maje bolš za 2 tysiačy akcyjaneraŭ: kantrolny pakiet naležyć jahonym supracoŭnikam dy žycharam rajonu. Rajvykankam sprabuje padparadkavać jaho sabie, kab atrymać bolšaść hałasoŭ na schodzie akcyjaneraŭ dy damahčysia źmieny kiraŭnictva kambinatu. Zrabić heta pasprabujuć da 4 kastryčnika, kali musić adbycca ŭstanoŭčy schod “Biełavieskaj charčovaj kampanii”.

Aleś Kudrycki