Biurakraty zdužali vytvorcaŭ
Stvareńnie padkantrolnaj rasiejskamu biznesu “Biełavieskaj charčovaj kampanii” (“Biurakraty proci vytvorcaŭ”, “NN” №34 za 13 vieraśnia) nabiraje chadu: 4 kastryčnika byŭ złamany supraciŭ Pružanskaha małočnaha kambinatu, jaki nie žadaŭ addavać svaje akcyi ŭ ruki rasiejcaŭ.
Siońnia pradpryjemstvy nia tolki Pružanskaha, ale j Kamianieckaha dy Kobrynskaha rajonaŭ majuć šaniec dałučycca da navaśpiečanaj “imperyi”. Pružanski kanservavy dy Linaŭski kruchmalny zavody, Pružanskaja rajahrapramtechnika dy Pružanski małočny kambinat užo addali svaje akcyi ŭ davierčaje kiravańnie “Biełavieskaj charčovaj kampanii”. Pieršyja try zdalisia biaz boju, apošni trymaŭsia z usich siłaŭ. Pieršy schod akcyjaneraŭ Pružanskaha małočnaha kambinatu ŭ lipieni nie nabraŭ kvorumu, druhi ŭ žniŭni prapanovu ŭvajści ŭ kampaniju adchiliŭ. Pružanskaja rajonnaja administracyja, zacikaŭlenaja ŭ paśpiachovaści taje kampanii, dobra padrychtavałasia da schodu akcyjaneraŭ małočnaha zavodu 4 kastryčnika, bo viedała, što siły nia maje: dziaržavie naležyć tolki 8% zavodzkich akcyjaŭ. Byli praviedzienyja zakulisnyja pieramovy ź bieraściejskimi abłasnymi ŭładami, jakija pieradali zavod u farmalnaje padparadkavańnie rajonnym uładam. Paralelna rajonnaje načalstva pačało prymušać staršyniaŭ kałhasaŭ dy dyrektaraŭ saŭhasaŭ, što trymajuć zavodzkija akcyi, addać hałasy na karyść ustupleńnia ŭ “Biełavieskuju charčovuju kampaniju”.
23 z 26 pahadzilisia, hetak nabrali jašče 37,1% hałasoŭ dy zdoleli ŭrešcie praciahnuć rašeńnie: zavod, jaki spłačvaje kala 40% rajonnych padatkaŭ, hublaje samastojnaść.
Hetkim čynam, “Biełavieskaja charčovaja kampanija” budzie stvoranaja. Kantrolny pakiet jaje akcyjaŭ (55,2%) budzie naležać rasiejskim akcyjaneram, biełaruskija pradpryjemsty atrymajuć 44,8%. Abmiažoŭvacca charčovymi pradpryjemstvami kiraŭnictva kampanii nia maje namieru: planujecca stvaryć “Biełavieski pramysłovy kancern”, u jaki ŭvojduć pradpryjemstvy, što nie zajmajucca niepasredna vyrabam charčovych praduktaŭ, a taksama handlovy dom “Biełavieskija pradukty”, jaki budzie pradavać pradukcyju ŭ maskoŭskim rehijonie.
Stvaralniki “Biełavieskaj charčovaj kampanii” abiacajuć dapamahčy raźvivacca pradpryjemstvam Bieraściejščyny. Umovaj dapamohi jany faktyčna vystavili pieradaču infrastruktury Pružanščyny, Kobrynščyny dy Kamianieččyny ŭ ruki rasiejskich kampanijaŭ.
Aleś Kudrycki
Ciapier čytajuć
U Francyi ad śpioki zahinuŭ dalnabojščyk z Dokšycaŭ8
Kamientary