Амаль палова задэклараванай Сірыяй хімічнай зброі была вывезеная, паведаміла Арганізацыя па забароне хімічнай зброі (АЗХЗ). За мінулы тыдзень яшчэ дзве партыі найбольш небяспечных хімічных рэчываў былі адпраўленыя на спецыяльных грузавых судах з сірыйскага порта Латакія, заявіла АЗХЗ.
За час аперацыі агулам было вывезена 10 кантэйнераў з таксічнымі рэчывамі. АЗХЗ плануе знішчыць або вывезці ўвесь хімічны арсенал да 30 чэрвеня. У мінулым годзе сірыйскія ўлады пагадзіліся знішчыць сваю хімічную зброю, пасля таго як у выніку газавай атакі ў прыгарадзе Дамаска загінулі сотні мірных жыхароў.
Заходнія краіны кажуць, што толькі сілы сірыйскага ўрада маглі правесці гэтую атаку, але прэзідэнт Башар Асад абвінаваціў у гэтым нападзе паўстанцаў.
Адставанне ад графіка
Паводле паведамлення АЗХЗ, таксічныя рэчывы былі дастаўленыя ў порт Латакіі 14-га і 17-га сакавіка і пагружаныя на суда.
У 10 вывезеных кантэйнерах змяшчалася 45,6% хімічнай зброі, прызначанай для знішчэння. Гэта складае 29,5% таксічных рэчываў самай небяспечнай «першай катэгорыі» і 82,6% рэчываў «другой катэгорыі».
Усе запасы іпрыту былі вывезеныя. Гэта баявое атрутнае рэчыва скурна-нарыўнага дзеяння.
Раней кіраўніцтва АЗХЗ заявіла, што ў вывазе хімічнай зброі з Сірыі дасягнуты прагрэс, нягледзячы на тое, што сірыйскія ўлады не выканалі некаторыя ўмовы пагаднення ў вызначаныя тэрміны.
Першапачаткова планавалася, што рэчывы «першай катэгорыі» будуць вывезеныя да 31 снежня, а рэчывы «другой катэгорыі» — да 5 лютага.
Сірыйскі ўрад у якасці прычыны затрымкі назваў праблемы, звязаныя з арганізацыяй вывазу і бяспекай.
Хто забараняе ў Беларусі кнігі — вось гэтыя 22 чалавекі33
Каментары