«Беларускія партызаны з Гродна» абяцаюць змагацца супраць «бандэраўцаў»
На Ютубе з'явілася відэа, на якім «беларускія партызаны з Гродна» падтрымалі гэтак званае народнае апалчэнне паўднёвага ўсходу Ўкраіны. У апісанні відэа сказана, што гэта нібыта «партызаны атраду «Віхор» з беларускага горада Гродна».
У кадры — два хлопцы ў камуфляжы і масках, якія закрываюць твар. За імі на дрэве вісіць чырвона-зялёны сцяг. Мяркуючы па галасах, ім гадоў па 17—20. Паставы выдаюць адсутнасць вайсковай выпраўкі, уражанне падмацоўваецца тым, як вісіць на іх камуфляж і зброя. Хлопцы ў войску не служылі (параўнайце з падабранымі «зялёнымі чалавечкамі» на ўсходзе Украіны).
Пытанне таксама: ці ў Беларусі ўвогуле відэа знятае. Яно з'явілася на акаўнце расійскага інфармацыйнага агенцтва «Сибинтеринфо».
Загаловак яго — «Обращение партизанив Белоруссии к ополчению Юго-востока Украины». Дзіўна, што слова «партызанаў» напісана з украінскім канчаткам.
«Звяртаемся да войскаў паўднёвага ўсходу і самога паўднёвага ўсходу, — кажуць «партызаны». — Запомніце: мы, Беларусь, з вамі, Расея таксама з вамі. Ня верце хлуслівым СМІ і ўсяму, што там гавораць. Мы будзем змагацца супраць бандэраўцаў разам з вамі, плячом да пляча. А вы трымайцеся там», — гавораць яны.
«Запомніце, рабяты: гэта наша зямля! Ворагу тут месца няма. Дзяды ваявалі, прадзеды ваявалі, і мы павінны працягнуць іх справу, гэта наша зямля. Нам тут жыць, і тут жыць нашым дзецям і нашым унукам», — гаворыцца ў паведамленні.
«Партызаны» звярнуліся да так званых «бандэраўцаў». Для гэтага адзін з іх падышоў бліжэй да камеры — ажно яна трохі запацела ад яго дыхання.
Цікава, што ён ужывае турэмна-слэнгавае слова «папуталі», вядомае па расейскіх крымінальных серыялах.
«Вы, рабяты, папуталі: гэта не тая зямля, дзе будуць выконваць вашую волю. Тут мы гаспадары. Госць застаецца госцем да таго часу, пакуль у доме ёсць гаспадар. І ён у гэтым доме ёсць, паверце», — заявілі «партызаны» на відэа.
Цяпер чытаюць
Скандал у полацкай школе: маці сцвярджае, што яе сына збілі на трэніроўцы па дзюдо — так хлопца «выхоўваў» трэнер11
Каментары