Андраш Рац: Беларусь не змагла б адказаць на гібрыдную вайну нават так, як украінцы
Такую думку венгерскі палітолаг выказаў на канферэнцыі «Беларусь на авансцэне Еўразіі: між Масквой і Кіевам», што адбываецца 31 мая — 1 чэрвеня ва Універсітэце Лазарскага ў Варшаве.
Гэта 7-я такая канферэнцыя на беларускую тэматыку ў прыватным польскім універсітэце, дзе навучаецца шмат беларускіх студэнтаў-платнікаў.
Якія высновы можна зрабіць з Еўрамайдану?
«У адрозненне ад каляровых рэвалюцый, Еўрамайдан не быў звязаны з выбарамі. Пратэсты могуць выбухнуць у любы час, і неабавязкова патрэбна, каб іх арганізоўвалі палітычныя партыі. Прычым Еўрамайдан выбухнуў спантанна, за ім не стаялі замежныя сілы», — адзначае Андраш Рац.
На думку Раца, нашмат важнейшыя тыя замежнапалітычныя высновы, якія можна зрабіць з украінскай сітуацыі.
Як аказалася, «Расія не толькі гатовая дэстабілізаваць сітуацыю ў суседніх краінах і парушаць устаноўленыя межы, але і ганарыцца такімі сваімі дзеяннямі». Масква, як аказалася, гатовая ўжываць інструмент «гібрыднай вайны» ў замежнай палітыцы ў дадатак да традыцыйных інструментаў. «І няма яснай стратэгіі, як абараняцца ад гібрыднай вайны», — кажа Рац.
У той жа час падзеі ва Украіне паказалі, што «некалькі сотняў дыверсантаў ці штурмавікоў могуць захапіць шмат будынкаў і выклікаць вялікі хаос, але не здольныя ўтрымаць тэрыторыю даўжэйшы час ад наступу рэгулярнай арміі», — кажа Рац. Асабліва калі ўкраінскія ўлады могуць абаперціся на вялікую частку грамадства і на міжнародную супольнасць.
Падзеі ў Данбасе паказалі, што для прадухілення гібрыднай вайны патрэбная моцная мяжа, каб у краіну не пранікала зброя.
Але Беларусь не мае мяжы з Расіяй, адзначае Рац.
Украінскія падзеі таксама паказалі, што «сілавыя структуры былі масава інфільтраваныя расійскімі агентамі», — адзначае Рац.
У выніку кіраўнік Чарнаморскага флота Украіны заклікаў маракоў перайсці пад сцягі Расіі. Пасля здраднікамі аказаліся высокапастаўленыя афіцэры группы «Альфа», у выніку чаго пад Славянскам загінуў кіраўнік гэтай структуры.
На думку Раца, сітуацыя з сілавікамі ў Беларусі можа быць або такая ж кепская, або яшчэ горшая.
Венгерскі палітолаг робіць выснову, што на сёння Беларусь застаецца мала слаба абароненай ад пагрозы з усходу.
Калі Масква ў той ці іншы момант вырашыць ліквідаваць беларускую дзяржаўнасць, Беларусі няпроста будзе бараніцца.
-
Статкевіч: Для Беларусі можа стварыцца такая сітуацыя, што ўсе дзяржавы вакол нас будуць мець ядзерную зброю
-
Стаўка большая, чым жыццё: што азначае ліст Зяленскага Пуціну
-
Палітвязень Кім Самусенка параўнаў свет на моманты яго пасадкі і вызвалення: Усё нядрэнна для еўрапейскай цывілізацыі, а значыць, і для беларусаў
Каментары