У Мінску судзяць былога галоўнага следчага сталіцы, які 10 гадоў хаваўся ў Расіі
У Мінскім абласным судзе пачаўся працэс у дачыненні да былога намесніка начальніка папярэдняга следства ГУУС Мінгарвыканкама Георгія Жука.
Палкоўнік міліцыі абвінавачваецца ў тым, што ў 2005 годзе атрымаў хабар у 80 тысяч долараў (ч. 3 арт. 430 КК). Пасада кіраўніка тады была вакантнай, таму абавязкі начальніка выконваў Жук. Вядома, што ў гэтым жа годзе ён пайшоў на пенсію. На той момант яму было 50 гадоў.
Паводле версіі следства, супрацоўнік міліцыі ўзяў грошы ад прадпрымальніка, каб праверкі яго бізнесу спыніліся і крымінальная справа ў дачыненні да яго была спыненая. Вядома, што тры чалавекі, якія ўдзельнічалі ў перадачы хабару, ужо асуджаныя Вярхоўным судом.
Жук ўвесь гэты час хаваўся ў Расіі. Ён быў абвешчаны ў міжнародны вышук. У 2015 годзе быў затрыманы на тэрыторыі РФ і ў кастрычніку экстрадаваны ў Беларусь і змешчаны ў СІЗА Віцебска.
Падсудны віну не прызнае. Сцвярджае, што прадпрымальнікі, якія праходзяць па справе як сведкі, далі супраць яго ілжывыя паказанні.
Генеральная пракуратура заявіла іск аб спагнанні з Жука 80 тысяч долараў — даходу, атрыманага злачынным шляхам.
Калі віна былога супрацоўніка МУС будзе даказаная, яму пагражае ад 5 да 15 гадоў пазбаўлення волі з канфіскацыяй маёмасці.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень11
Каментары