Пасол Украіны: Амбасадары 10 краін прыйшлі ўшанаваць памяць ахвяр Галадамору, хаця іх запрашаў на вячэру амбасадар Расіі
У пятніцу, 23 лістапада, у Чырвоным касцёле адбылася імша-рэквіем памяці загінуўшых ад Галадамору.
Сёлета адзначаюцца 85-я ўгодкі Галадамору.
Амбасадар Украіны ў Беларусі Ігар Кізім у сваёй прамове падзякаваў усім, хто памятае і хто прыйшоў раздзяліць боль украінскага народа.
Ігар Кізім назваў Галадамор найвялікшай трагедыяй украінскага народу.
«Чатыры з паловай мільёны чалавек загінулі за 1932-1933 гады ва Украіне. Пачуйце гэтую лічбу тыя, хто спрабуе апраўдаць тагачасную палітыку савецкай дзяржавы. Памерлых назад не вярнуць, але мы павінны агучваць імёны тых, з чыйго дазволу ажыццяўляліся страшныя злачынствы, мы павінны гаварыць пра жахі сталінскага рэжыму», — сказаў амбасадар.
Ігар Кізім нагадаў: у тым, што ўкраінскі народ выжыў у тыя страшныя часы, не апошнюю ролю адыгралі і беларусы, якія прынялі ў сябе людзей, што беглі з Украіны ад голаду.
Сведчанне гэтым словам — помнік у невялікім мястэчку Доўск, што на Гомельшчыне. На сімвалічным крыжы, які аднавілі сёлета, словы: «Мы выжылі, бо вы дапамаглі».
«Гэта гісторыя адной сям'і з Чаркашчыны, — расказаў Ігар Кізім, — Іх прытуліла мясцовая сям'я, якая дзяліся з украінцамі хлебам. І за гэта наша вялізная ўдзячнасць усім беларусам».
Пасля Ігар Кізім расказаў «Наша Ніве», як шкадуе, што не можа ў сваіх дзядоў спытацца, як яны выжылі ў Галадаморы. Дзяды амбасадара Украіны загінулі падчас вайны.
«Аднак я ведаю, што гэта трагедыя закранула сем'і маіх сяброў. Мне расказваў адзін знаёмы, што ён выжыў толькі дзякуючы таму, што яго бацькі адвезлі на вакзал у Харкаве, там пакінулі. А міліцыя забірала дзяцей на вакзалах і адвозіла ў дзіцячыя дамы. Ён выжыў. Каб застаўся ў роднай вёсцы, загінуў бы, як уся яго сям'я».
Пасля Ігар Кізім патлумачыў, чаму яго прамова была зачытаная на розных мовах:
«Каб усе зразумелі тое, пра што я кажу. Я бачыў сёння ў зале амбасадараў з 10 краін, а дыпламатаў з розных амбасад яшчэ больш. Прыйшлі амбсадары Нідэрландаў, Злучаных Штатаў, Швецыі, Нарвегіі, Румыніі. Трэба сказаць, што ў гэты ж час іх запрашаў да сябе амбасадар Расіі, але яны выбралі Украіну, прыйшлі ўшанаваць памяць, а не павячэраць з амбасадарам Расіі. Гэта паказальна».
У суботу ўся Украіна роўна а 16-й гадзіне запаліць свечкі памяці па ахвярах Галадамору.
Каментары