Ці праўда дарагая карэйская касметыка цудадзейная? Параўналі з беларускімі аналагамі
Карэйскія крэмы і маскі для твару сталі настолькі папулярныя, што прадаюцца ледзь не ў кожнай касметычнай краме. Каштуюць нятанна, але наколькі яны эфектыўныя? Мы прапанавалі касметолагу ўсляпую параўнаць склады пяці азіяцкіх сродкаў і іх танных беларускіх аналагаў. Спойлер: некаторыя вынікі аказаліся нечаканымі.
Пілінг-скатка
— Ён працуе як мяккі скраб. Здымае паверхневы эпідэрміс, які ўжо памёр, але па нейкіх прычынах не злупіўся. Такі пілінг мы рэкамендуем пяшчотным тонкім скурам, якія не хочам траўміраваць вострым абразівам, — тлумачыць доктар-касметолаг, дэрматолаг першай кваліфікацыйнай катэгорыі цэнтра «Скінлюкс» Жанна Кудзіна.
У беларускім сродку спецыяліст адразу звяртае ўвагу на вялікую колькасць сінтэтычных складнікаў: гэта можа выклікаць алергію. Шмат PEG — гэты кампанент дадаюць для ўвільгатнення скуры і прадаўжэння тэрмінаў прыдатнасці касметыкі, але ён можа пранікаць унутр і накаплівацца ў нырках. Таму насіць такую касметыку пастаянна непажадана. Тым больш у складзе ёсць дыметыкон (ці сілікон), які пры рэгулярным выкарыстанні не дае скуры дыхаць і пагаршае яе стан.
З натуральных кампанентаў — цынк і пантэнол. Першы падсушвае, другі — увільгатняе. Не зразумела, для якога тыпу скуры падыдзе такі пілінг.
Карэйскі варыянт касметолагу падабаецца больш.
— Тут у вялікай колькасці знаходзіцца гліцэрын, які патрэбны для ўвільгатнення, добрае ўтрыманне натуральных кампанентаў. З негатыўнага — таксама ёсць PEG і ізапрапілавы спірт. Апошні можа выклікаць алергічныя рэакцыі і не вельмі добры для цяжарных, бо можа пранікаць у тканкі плода. Але тут гэтыя кампаненты ў канцы спісу.
Ачышчальная маска з вуглём
Такія маскі прызначаны, каб сарбіраваць скураное сала і таксіны: яны, як губка, убіраюць у сябе лішкі. Скура становіцца больш аксамітнай. Добры варыянт для тых, у каго нармальная ці камбінараваная скура, ёсць схільнасць да высыпанняў. А вось сухая скура горш пераносіць такі склад.
— Першы варыянт пачынаецца з PEG. Гэта вечны прэпарат, які можна захоўваць у ваннай і не баяцца, што там завядуцца мікраарганізмы: ім няма чым пажывіцца, — жартуе касметолаг. — Шмат аддушак, стабілізатараў і кансервантаў. Невялікую колькасць натуральных кампанентаў бачым толькі ў канцы спісу.
І задаемся пытаннем: а дзе ж вугаль? Я не знайшла. Гэта маска больш падсушвае, чым сарбіруе.
У карэйскай масцы таксама хапае шкодных кампанентаў. Але ў складзе адразу пасля вады стаяць бетаін і каалін — сарбенты, якія і даюць эфект губкі. Таму гэта маска будзе больш дзейсная. Плюс у ёй утрымліваюцца экстракты лаванды, рамонка і размарыну (яны супакойваюць раздражнёную скуру) і калаген з бентанітам (дадаткова ўвільгатняюць).
Крэм з муцынам смаўжа
Карэйскі крэм расчараваў: разрэкламаванага экстракту ў ім амаль няма. А ў беларускім аналагу цуда-інгрэдыенту не пашкадавалі — ён на трэцяй пазіцыі.
— Я як спажывец хачу смаўжа і плачу за яго, а не за незразумелыя кансерванты і масла, — кажа Жанна Кудзіна. — У гэтым крэме, канечне, шмат стабілізатараў, але з улікам таго, што тут шмат слізі, напэўна, гэта апраўдана, каб яе захаваць. Галасую за другі варыянт.
Асвятляльны крэм
Каб крэм асвятляў пігментныя плямы, у ім павінны быць кіслоты. Яны ёсць і ў карэйскім, і ў беларускім сродку.
Але ў кожным з іх касметолаг знаходзіць недахопы. У першым — значная колькасць PEG і спіртоў. У другім, акрамя спіртоў, ёсць аксіды алюмінію: у Еўропе прэпараты з імі забараняюць, паколькі яны могуць правакаваць развіццё раку малочнай залозы. Плюс у складзе сілікон, які, нагадаем, не дае скуры дыхаць, — ён робіць скуру аксамітнай толькі пакуль на ёй ляжыць.
— Тут складана выбраць. Мне ні адзін, ні другі не падабаецца па сваім складзе. Але ў першым хоць ёсць масла шы, якое ўвільгатняе. Напэўна, з вялікай нацяжкай я б аддала перавагу гэтаму сродку, — кажа экспертка пра карэйскі крэм.
Патчы пад вочы з ліфтынг эфектам
— Першы варыянт я б купіла. На першых месцах — гліцэрын, калаген, якія добра ўвільгатняюць. Плюс тут ёсць гіалуронавая кіслата. Больш просты і натуральны склад, — каментуе Жанна Кудзіна.
Пару слоў пра гіалуронавую кіслату: яна кладзецца на скуру плёначкай і цягне ваду з глыбокіх слаёў у паверхневыя, тым самым іх увільгатняе. Але гэта бессэнсоўна, калі вы п’яце недастаткова вады ці часта сядзіце пад кандыцыянерам.
У беларускіх патчах ёсць бісабалол (ліквідуе цёмныя кругі пад вачыма) і экстракт арнікі (паляпшае кровазварот). Увільгатненне тут дасягаецца за кошт мачавіны. «Хоць пад вочы мне б не вельмі гэты кампанент хацелася», — усміхаецца касметолаг.
Што маем? Азіяцкія патчы адназначна лепш справяцца з ліфтынгам. Беларускія такога эфекту не дадуць. Затое дапамогуць прыбраць цёмныя кругі, мяшкі і ацёчнасць пад вачыма.
Каб раставіць кропкі над «і»: усе кансерванты і стабілізатары, якія мы ўбачылі ў касметыцы, дапушчаны да вытворчасці.
«Яны прымяняюцца нават у люксавых марках. Але па магчымасці лепш адмаўляцца ад сінтэтычных кампанентаў на карысць натуральных», — раіць Жанна Кудзіна.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень5
Каментары