«Белнафтахім» адпраўляе дэлегацыю ў Казахстан наконт паставак нафты. Нур-Султан будзе думаць
Запыт ад Беларусі на пастаўку нафты ад Казахстана паступіў, у студзені ў рэспубліку прыедуць прадстаўнікі «Белнафтахіма», угода магчымая пры эканамічнай выгадзе для казахстанскіх кампаній, сказаў у сераду журналістам кіраўнік Мінэнерга Казахстана Нурлан Нагаеў, піша ria.ru
«Заява, просьба ад «Белнафтахіма» паступіла ў наш адрас, у адрас міністэрства. Прадстаўнікі ведамства плануюць прыехаць у Казахстан для абмеркавання пастаўкі. Мы на сённяшні дзень ажыццяўляем пастаўкі нафты па дыверсіфікаваных напрамках, і мы разгледзім прапанову беларускага боку», - сказаў Нагаеў журналістам.
Ён паведаміў, што ведамства арганізуе сустрэчу з зацікаўленымі кампаніямі Казахстана. «Калі хто-небудзь з нафтавых кампаній выявіць жаданне пры эканамічна выгаднай цане або пры ўмовах, якія іх задавальняюць, я думаю, што ўгода магчымая», - сказаў Нагаеў, дадаўшы, што перамовы плануецца правесці да 20 студзеня.
Нагадаем, што ўчора першы віцэ-прэм'ер Дзмітрый Круты па выніках нарады ў Лукашэнкі заявіў, што Беларусь накіравала камерцыйныя прапановы аб куплі нафты ва Украіну, Польшчу, Казахстан, Азербайджан і краіны Балтыі.
Азербайджан заявіў, што перамовы вяліся, Баку гатовы, але нічога канкрэтнага пакуль што няма. У Польшчы адзначылі, што немагчыма пастаўляць нафту па «Дружбе» ў аверсным і рэверсным рэжыме адначасова. Таксама пытанне транзіту нафты будзе абмеркавана падчас візіту ў Беларусь прэм'ера Латвіі Крыш'яніса Карыньша.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень8
Каментары