Скандал у Літве: пахавальная кантора, якая належыць Царкве, прадавала адныя і тыя ж труны па некалькі разоў
Прадпрыемства «Цэнтр пахавальных паслуг», якое належыць Службе эканомаў Віленскага арцыбіскупства, перапрадавала сваім кліентам труны, якія раней ужо былі ў ужыванні. Пра гэта сведчыць расследаванне, праведзенае Літоўскай нацыянальнай тэлерадыёкампаніяй LRT, піша delfi.lt.
Аказваецца, труны, у якіх нябожчыкі перавозіліся для крэмацыі ў крэматорый у Польшчы, не спальваліся, як належыць, а вярталіся пасля ў Літву і зноў паступалі ў гандаль. Ёсць сведчанні таго, што персанал у цэнтральнай зале крэматорыя змываў ацэтонам імёны людзей на вечках трунаў, у якіх іх перавозілі на крэмацыю.
Такі перапродаж трунаў, па сведчаннях работнікаў, доўжыўся каля трох гадоў. Звесткі, сабраныя LRT, паказваюць, што кліенты куплялі труны коштам ад 300 да 1000 еўра, але для крэмацыі цела пераносілі ў кардонныя труны коштам не большым за 16 еўра.
Толькі ў мінулым годзе на перапродажы ўжываных трунаў Цэнтр пахавальных паслуг змог зарабіць не менш за 45 тысяч еўра. Ягоныя кіраўнікі, праўда, кажуць, што вернутыя труны імі рэстаўраваліся. Аднак дадзеныя, сабраныя даследчым аддзелам LRT, сведчаць, што насамрэч у мінулым годзе кампанія рэстаўравала толькі чатыры труны, а вернутыя ім былі 150 штук.
У Арцыбіскупскай курыі журналістам паведамілі, што кампанія сама звязалася з людзьмі, якім паслугі не былі аказаныя ў поўным аб'ёме. А дырэктар Цэнтра пахавальных паслуг напісаў заяву аб вызваленні яго ад пасады па ўласным жаданні.
Цяпер чытаюць
Прапаганда рыхтуе грамадства да загадкавай «працяглай камандзіроўкі» Лукашэнкі35
Каментары