Сродкі Еўрасаюза, што прызначаліся Беларусі і Расіі, перанакіруюць Украіне і Малдове
Сродкі ад Еўрасаюза, якія раней былі запланаваныя на яго праграмы, сумесныя з Беларуссю і Расіяй, будуць перанакіраваныя Украіне і Малдове. Пра гэта паведамляецца на сайце Еўракамісіі.
Гаворка ідзе пра 135 млн еўра, запланаваныя на 2021—2027 гады па праграмах Interreg NEXT (адзін з інструментаў падтрымкі ЕС, які накіроўваецца на развіццё сфер аховы здароўя, экалогіі, навуковай дзейнасці, развіцця транспарту і іншых галін).
Зараз гэтыя сродкі будуць накіраваныя на аналагічныя патрэбы для Украіны і Малдовы. Пастанова прынятая праз вайну ва Украіне.
«Я радая, што сродкі, якія мы першапачаткова планавалі на гэтае супрацоўніцтва, зараз пойдуць на праграмы ЕС з Украінай і Малдовай. Гэта дапаможа ўмацаваць супрацоўніцтва паміж рэгіёнамі ЕС і мясцовымі зацікаўленымі бакамі з украінскімі і малдаўскімі партнёрамі», — заявіла еўрапейская камісарка па згуртаванні і рэформах Эліза Ферэйра.
ЕС ужо прыпыняў праграмы з Беларуссю і Расіяй у сакавіку 2022 года. Тады 26 млн еўра таксама перадавалі Украіне і Малдове.
Раней Еўрасаюз прыпыніў супрацоўніцтва з Расіяй і Беларуссю ў рамках праграм трансгранічнага супрацоўніцтва Еўрапейскага інструмента суседства (ENI CBC) і па праграме Interreg для рэгіёна Балтыйскага мора.
Агульнае фінансаванне Еўрасаюза для васьмі праграм з Расіяй складала 178 мільёнаў еўра, а агульнае фінансаванне ЕС для дзвюх праграм з Беларуссю — 257 мільёнаў еўра.
Цяпер чытаюць
Скандал у полацкай школе: маці сцвярджае, што яе сына збілі на трэніроўцы па дзюдо — так хлопца «выхоўваў» трэнер10
Каментары