Беларуская чыгунка прыбрала з раскладу маршрут гарадской электрычкі, на якім з Мінска ў Заслаўе да прыпынку «Беларусь» хадзілі цягнікі Stadler.
Апошні раз Stadler маршруту 7301 мусіў прайсці 14 верасня, заўважыла выданне «Тэлеграф».
У Беларускай чыгунцы не назвала прычын спынення руху. У той жа час звычайныя «савецкія» электрычкі па гэтым напрамку працягнуць хадзіць. З 15 верасня Беларуская чыгунка прызначыла новы маршрут 6141 эканом-класа.
На змену раскладу звярнулі ўвагу беларусы, пра што паведамілі ў TikTok.
Пад відэа пачалася дыскусія наконт прычын адмены, бо афіцыйнага тлумачэння не было. Адзін з каментатараў выказаў здагадку, што гаворка можа ісці пра няякасныя сучасныя цягнікі.
«Галоўнае — электрычкі савецкія яшчэ ходзяць, а сучасны транспарт усё, выпрацаваў свой рэсурс…» — напісаў ён.
Аднак яму запярэчылі, што хутчэй за ўсё справа ў недахопе запчастак для абслугоўвання, а не ў якасці.
Нагадаем, што швейцарская кампанія Stadler не пацвердзіла падпісанне кантракта з Беларускай чыгункай на пастаўку 65 цягнікоў. У кампаніі заявілі, што перамовы сапраўды вяліся, але ніякіх пагадненняў падпісана не было.
Супольнасць чыгуначнікаў Беларусі звяртае ўвагу, што асноўная прычына зняцця штадлераў з маршрутаў звязана з крытычным зносам колавых пар і поўнай адсутнасцю паставак запчастак праз санкцыі, што зрабіла эксплуатацыю небяспечнай. Акрамя таго, сітуацыю пагаршаюць выпадкі вандалізму і праблемы з дысцыплінай у мінскім дэпо, дзе нават адзін з апошніх працаздольных электрацягнікоў быў сур’ёзна пашкоджаны.
Цяпер чытаюць
Прапаганда рыхтуе грамадства да загадкавай «працяглай камандзіроўкі» Лукашэнкі31
Каментары