У Беларусі пачаў працаваць новы сэрвіс для прыёму анлайн-плацяжоў PayPro, які запусціў Банкаўскі працэсінгавы цэнтр, піша Office Life.

Галоўная асаблівасць платформы — магчымасць падключыць інтэрнэт-эквайрынг без абавязковай штомесячнай платы. Прадпрымальнікі будуць аплачваць толькі паспяхова праведзеныя плацяжы. Падключэнне сэрвісу займае да трох працоўных дзён.
PayPro прызначаны найперш для інтэрнэт-крам, службаў дастаўкі і арэнды, турыстычных кампаній, гатэляў, адукацыйных праектаў, а таксама сэрвісаў па продажы квіткоў і падарункавых сертыфікатаў.
Праз сэрвіс можна прымаць плацяжы ад кліентаў з розных краін. Ён падтрымлівае разлікі ў беларускіх рублях, далярах ЗША і еўра, працу з карткамі растэрміноўкі, а таксама прапануе асабісты кабінет для бізнэсу, бясплатны плацежны модуль для сістэм кіравання сайтамі і тэхнічную падтрымку.
Каб падключыць інтэрнэт-эквайрынг праз PayPro, неабходна пакінуць заяўку на сайце сэрвісу або звярнуцца да яго менеджараў. Цяпер платформа супрацоўнічае з шасцю банкамі-экваерамі. Памер камісіі залежыць ад банка і тыпу плацежнай карткі і складае ад 1,3 да 2,9 працэнта.
Каментары