За заклік на плошчу 24 лістапада.
24 лістапада афіцыйнае папярэджанне Генеральнай пракуратуры аб недапушчальнасці парушэння заканадаўства вынесена Мікалаю Статкевічу. Днём раней аналагічнае папярэджанне атрымаў Віталь Рымашэўскі.
Абодва палітыкі папярэджаны за тое, што, выступаючы па тэлебачанні ў якасці кандыдатаў у прэзідэнты, заклікалі грамадзян узяць удзел у акцыі на Кастрычніцкай плошчы Мінска вечарам 24 лістапада.
Як паведаміў журналістам начальнік упраўлення па наглядзе за захаваннем заканадаўства і законнасцю прававых актаў Генпракуратуры Павел Радзівонаў, згодна з рашэннем Мінгарвыканкама ад 11 лістапада 2010 года сустрэчы з выбаршчыкамі не могуць праводзіцца на Кастрычніцкай плошчы, плошчах Незалежнасці, Перамогі і Якуба Коласа, а таксама ў падземных пераходах, на станцыях метро і шэрагу іншых аб’ектаў.
Паводле слоў прадстаўніка Генпракуратуры, акрамя адміністрацыйнай адказнасці Рымашэўскаму і Статкевічу пагражае адказнасць у межах Выбарчага кодэкса.
Як паведаміў БелаПАН сакратар Цэнтрвыбаркама Мікалай Лазавік,
удзел кандыдата ў прэзідэнты ў забароненай акцыі можа пацягнуць два віды санкцый — папярэджанне і адмену рэгістрацыі.
«Усё будзе залежаць ад таго, у што выльецца акцыя. Калі кандыдат спыніцца на этапе закліку да ўдзелу ў акцыі і не стане парушаць выбарчае заканадаўства, то і рэакцыя Цэнтрвыбаркама будзе мяккай. Калі ж ён будзе свядома падштурхоўваць грамадзян да парушэння заканадаўства, то і санкцыі могуць быць прыменены сур’ёзныя», — растлумачыў сакратар ЦВК.
Нягледзячы на папярэджанне Генпракуратуры, Віталь Рымашэўскі і Мікалай Статкевіч заявілі, што не маюць маральнага права адмовіцца ад удзелу ў акцыі, бо публічна заклікалі выбаршчыкаў прыйсці на сёння вечарам на Кастрычніцкую плошчу.
Аб правядзенні 24 лістапада ў цэнтры Мінска акцыі супраць удзелу Аляксандра Лукашэнкі ў чарговых прэзідэнцкіх выбарах было аб’яўлена яшчэ ў верасні. Акцыя прымеркавана да канстытуцыйнага рэферэндуму 1996 года, які быў ініцыяваны Лукашэнкам.
Хто забараняе ў Беларусі кнігі — вось гэтыя 22 чалавекі33
Каментары