Пазытывы

Пазытывы

Ці выкарыстаем мы свой шанец?

10 жніўня 2000 г. адбылася сустрэча начальніка Ўпраўленьня адукацыі Менгарвыканкаму сп.М.Ціцянкова, начальніка аддзелу агульнай сярэдняй адукацыі сп.А. Фраловай і старшыні гарадзкой Рады ТБМ імя Ф.Скарыны сп.А. Анісім. Асноўнае пытаньне, якое абмяркоўвалася на сустрэчы — адкрыцьцё беларускамоўнай гімназіі ў цэнтры сталіцы. Сп. М.Ціцянкоў паведаміў, што рэальная дата адкрыцьця такой гімназіі – праз чатыры гады на базе 19-й або 23-й СШ. Гэта з улікам таго, што сёньня ўсе гімназіі пачынаюць працаваць цалкам адасоблена ад пачатковай школы. Аднак, падмурак будучай нацыянальнай гімназіі трэба закладаць сёньня. Такім чынам, бацькі сёньняшніх вучняў падрыхтоўчых клясаў атрымліваюць рэальную магчымасьць забясьпечыць сваім дзецям добрую беларускамоўную адукацыю.

У ходзе абмеркаваньня сп-ні А.Анісім была перададзеная інфармацыя на расейскай мове аб колькасьці заяваў, прынятых у падрыхтоўчыя клясы Менску па мовах навучаньня на 2000/2001 навучальны год (па стане на 7 жніўня). Прывядзем зьвесткі па колькасьці заяваў на беларускамоўнае навучаньне.

Прычына невялікай колькасьці заяваў на беларускую мову навучаньня — недастатковая інфармаванасьць бацькоў. У прыватнасьці, пра гэта думаецца, калі даведваесься, што, напрыклад, у 10-ю гімназію, якая знаходзіцца ў мікрараёне Паўднёвы Захад, не паступіла ніводнай заявы на беларускамоўнае навучаньне. Відавочна, бацькі, ведаючы, што летась не было набору дзяцей у беларускія клясы ў гэтую навучальную ўстанову, сёлета проста туды не пайшлі. Варта адзначыць, што ў мікрараёнах Паўднёвы Захад і Малінаўка склалася дзіўная сытуацыя: на значную колькасьць насельніцтва, учорашніх выхадцаў зь вёскі – ніводнай беларускай школы, гімназіі і ліцэя. Такая сытуацыя ня можа не трывожыць. І ў гэтым пляне варта як сьлед папрацаваць і ТБМ, і ўпраўленьням адукацыі.

У сувязі з гэтымі фактамі зьвяртаюся да бацькоў сёньняшніх вучняў падрыхтоўчых клясаў: калі Вы яшчэ ня вызначыліся, у якую школу ці клясу хацелі б аддаць сваё дзіця, зьвярніце ўвагу на беларускамоўныя клясы і школы. Зьвяртаемся да бацькоў, якія падалі заявы на расейскую мову навучаньня ў сярэдніх школах №№ 8, 109, 210, 15, 90, 39, 108, 190, 191, 177, 137, 49, 19, 38, 81, 96, 156, 211, школу-ліцэй 16. Дарагія бацькі, калі ласка, перапішэце свае заявы на беларускую мову навучаньня, бо ў азначаных школах могуць быць не адчыненыя беларускамоўныя клясы з-за малой колькасьці навучэнцаў. Нашым дзецям жыць у ХХІ ст. Не адбірайце ж у іх права быць сапраўднымі патрыётамі, сьвядомымі грамадзянамі нашай цудоўнай Радзімы – Беларусі.

З усімі пытаньнямі зьвяртайцеся ў сядзібу ТБМ імя Ф.Скарыны: вул. Румянцава, 13, тел. 284-85-11.

 Старшыня гарадзкой Рады
ТБМ імя Ф.Скарыны А.Анісім