U prahramu raźvićcia chakieja letaś ukłali ŭ 15 razoŭ bolš, čym zapłanavali
Zatoje ŭ «Kardyjałohii» i prahramie demahrafičnaj biaśpieki kapitalnyja ŭkładańni tak i nie asvoili.
U krainie realizujecca kala 80 dziaržaŭnych prahram. Heta samyja raznastajnyja prajekty — ad raźvićcia rybahaspadarčaj dziejnaści da prafiłaktyki lačeńnia suchotaŭ. Pryčym na ich idzie niamała hrošaj. Naprykład, u letašnim biudžecie z ahulnych $11 miljardaŭ na dziaržaŭnyja prahramy było vydzielena amal $2 miljardy.
Adnak płan finansavańnia mocna adroźnivajecca ad faktyčnaha zasvajeńnia srodkaŭ.
«Naša Niva» skłała rejtynh dziaržaŭnych prahram, jakija letaś adznačylisia najbolšym pieraraschodam kapitalnych układańniaŭ.
Na pieršym miescy Dziaržaŭnaja prahrama raźvićcia palaŭničaj haspadarki na 2006–2015 hadoŭ, na jakuju letaś było vydatkavana ŭ 44 razoŭ bolš, čym zapłanavana — $1,5 miljona.
Druhaja — Dziaržaŭnaja prahrama raźvićcia chakieja z šajbaj na 2011–2014 hady. Letaś płanavałasia ŭkłaści ŭ kapitał $24 tysiačy, a vyjšła ažno $400 tysiač — amal u 15 razoŭ bolš.
Kapitalnyja ŭkładańni ŭ raźvićcio «Biełaruśkalija» mielisia skłaści $87 miljonaŭ, a ŭ realnaści dasiahnuli $775 miljonaŭ — pieraraschod u 8,9 razu.
Adnak byli i prahramy, u jakich hrošy na kapitalnyja ŭkładańni tak i nie byli patračanyja.
Letaś srodki nie byli vykarystanyja na prahramy zasvajeńnia radoviščaŭ karysnych vykapniaŭ (patračana $372 tysiačy — 43% ad płanu) demahrafičnaj biaśpieki Biełarusi (patračana $8,2 miljona — 53% ad płanu), a taksama «Kardyjałohija» (patračana $4,3 miljona — 55% ad płanu).
Kamientary