Miadźviedzieŭ prapanavaŭ acanić situacyju ź biełaruskaj małočnaj pradukcyjaj

Premjer-ministr Rasii Dźmitryj Miadźviedzieŭ 8 kastryčnika na naradzie ŭ Varoniežskaj vobłaści prapanavaŭ acanić situacyju z pastaŭkami biełaruskaj małočnaj pradukcyi na rasijski rynak, kamientujučy zaniepakojenaść niekatorych rasijskich vytvorcaŭ, a taksama čynoŭnikaŭ vialikaj prysutnaściu biełaruskich praduktaŭ u hetaj śfiery.

Jak paviedamlaje RIA Novosti, hubiernatar Varoniežskaj vobłaści Alaksiej Hardziejeŭ (były ministr sielskaj haspadarki Rasii.) prapanavaŭ uvieści kvotu ŭ pamiery 2 młn. ton u hod i nazvaŭ prysutnaść biełaruskich małočnych praduktaŭ na rasijskim rynku daminavańniem.

Pavodle słoŭ Hardziejeva, Biełaruś z 7 młn. ton vyrablajemaj pradukcyi ŭ Rasiju pastaŭlaje 4 młn. ton.

«Daminavańnie Biełarusi jak hulca na małočnym rynku Rasii vyklikaje apasieńnie, u tym liku i ŭ manapolnym płanie: 25% rynku hatovaj pradukcyi zajmaje Biełaruś», — skazaŭ hubiernatar.

Rasijski premjer adznačyŭ, što kvoty ŭžo niemahčyma pryniać u adpaviednaści ź dziejnymi pahadnieńniami pamiž dźviuma dziaržavami.

«Adnosna bałansu ź Biełaruśsiu — tema składanaja», — skazaŭ Miadźviedzieŭ. «U nas, na žal, niama kvot siońnia ŭ prymianieńni da našych adnosin ź Biełaruśsiu, tamu što ich naohuł nie moža być užo ŭ ramkach Mytnaha sajuza, u nas jość niejkija prahnoznyja bałansy, jakija, na žal, nie majuć ahulnaabaviazkovaha značeńnia», — dadaŭ jon.

Miž tym Miadźviedzieŭ padkreśliŭ, što Rasii «treba raźvivać ułasnuju vytvorčaść, heta — hałoŭnaje». «Vy spraviadliva adznačajecie, što my tut pavinny kankuryravać sumlenna», — skazaŭ jon, źviartajučysia da Hardziejeva.

«Tym nie mienš davajcie acenim usio, što adbyvajecca pa hetaj trajektoryi, i kali buduć prapanovy, ja hatovy heta i biełaruskim kaleham prapanavać», — dadaŭ premjer.

Jak paviedamlałasia, pavodle źviestak Minsielhascharču, za studzień—červień 2013 hoda Biełaruś ad ekspartu 1,8 młn. ton małaka i małakapraduktaŭ atrymała bolš čym 1 młrd. dołaraŭ ZŠA valutnaj vyručki. Ekspart małaka i małakapraduktaŭ ź Biełarusi składaje 38% ad ekspartu sielskahaspadarčaj pradukcyi i charčavańnia.

Asnoŭnym handlovym partnioram źjaŭlajecca Rasija, na hety rynak pastaŭlajecca bolš čym 95% małaka i małakapraduktaŭ. Za šeść miesiacaŭ u RF, pavodle źviestak Biełstata, ekspartavana 1,7 młn. ton małaka i małakapraduktaŭ, rost ekspartu skłaŭ 122,1%.

• 0
• 0
• 0
• 0
• 0
• 0
• 0
• 0