Avijakampanija «Biełavija» pryniała kančatkovaje rašeńnie admovicca ad vykanańnia rejsaŭ u Simfieropal u hetym letnim siezonie, paviedamiŭ žurnalistam 18 krasavika ŭ Minsku hienieralny dyrektar kampanii Anatol Husaraŭ.
«Usim viadomaja situacyja, jakaja adbyvajecca. My majem mahčymaść vykonvać paloty ŭ tym liku i ŭ Simfieropal, ale popyt na hety napramak ciaham lutaha, sakavika i pačatku krasavika nižejšy za minułyja hady», — padkreśliŭ Husaraŭ.
«My ŭvažliva adsočvali, analizavali, paraŭnoŭvali z papiarednimi hadami. Navat ź liku tych pasažyraŭ, jakija zabraniravali abo nabyvali bilety na hety napramak, byŭ adtok pasažyraŭ. Heta značyć ludzi zdavali bilety. Tamu pryniata rašeńnie, što sioleta my ŭ Simfieropal rejsy, na žal, vykonvać nie budziem», — skazaŭ hiendyrektar «Biełavija».
Na pytańnie, ci moža hetaje rašeńnie być pierahledžana na praciahu letniaha siezona, Husaraŭ adkazaŭ admoŭna: «Hetaje rašeńnie kančatkovaje, my ŭžo pieranakiravali samaloty pa inšych napramkach, u tym liku na vykanańnie čartarnych rejsaŭ».
Rašeńnie ab admienie letnich rejsaŭ u Simfieropal nacyjanalnaja avijakampanija «Biełavija» pryniała ŭ suviazi ź ich «małoj kamiercyjnaj zahruzkaj», zajaviŭ 3 krasavika BiełaPAN namieśnik hienieralnaha dyrektara «Biełavija» Ihar Čarhiniec. Pavodle jaho słoŭ, hetaje rašeńnie nie źviazana z pryniataj 2 krasavika Jeŭrakantrolem zabaronaj na paloty ŭ Krym. «My pryniali rašeńnie krychu raniej. U paniadziełak (31 sakavika)», — skazaŭ Čarhiniec.
U papiarednija hady rejs Minsk — Simfieropal karystaŭsia papularnaściu ŭ pasažyraŭ.
«Niepapularny sioleta, — skazaŭ Čarhiniec. — Reč u tym, što hety rejs vykonvajecca ŭsiaho try miesiacy na hod — z pačatku červienia pa kaniec žniŭnia. Kali jon zaraz nie pradaŭsia, to kali jaho pradavać tady? Braniravańni byli, ale vielmi mała ŭ paraŭnańni z anałahičnym pieryjadam, naprykład, minułaha ci pazaminułaha hadoŭ. U niekalki razoŭ mienšy prodaž. Zaraz prykładna 100 čałaviek u adzin bok zabraniravali. U papiarednija hady ŭ niekalki razoŭ bolš braniravali».
Razam z tym administracyja Mikałajeŭskaj vobłaści Ukrainy ličyć metazhodnym adkryćcio čartarnych avijarejsaŭ ź Minska ŭ Mikałajeŭ.
Pra heta paviedamiŭ dyrektar departamienta ekanamičnaha raźvićcia, handlu i turyzmu administracyi Mikałajeŭskaj vobłaści Michaił Tulski 16 krasavika ŭ Koblevie (Bierazanski rajon, Mikałajeŭskaja vobłaść) na sustrečy ź biełaruskimi žurnalistami i pradstaŭnikami turfirm. Pavodle słoŭ pradstaŭnika administracyi rehijonu, viaducca pieramovy ź biełaruskimi ŭładami, adnak pryncypovaj zhody pakul niama. «My miarkujem, što znosiny cieraz čartarnyja rejsy abo praz pastajannyja rejsy Nikałajeŭ — Minsk dało b mahčymaść zabiaśpiečyć navat biaśpieku pieramiaščeńnia, a samaje hałoŭnaje — zručnaść turystaŭ», — zaznačyŭ śpiecyjalist.
Kamientary