U 2015 hodzie ŭ Minsku ŭpieršyniu płanujecca pravieści mižnarodnuju navukovuju kanfierencyju, pryśviečanuju zachavańniu niekropalaŭ i miescaŭ pachavańnia.
Ź idejaj pravieści takuju kanfierencyju vystupiŭ namieśnik dyrektara Instytuta historyi Nacyjanalnaj akademii navuk Biełarusi Vadzim Łakiza na pasiadžeńni kruhłaha stała «Niekropali Biełarusi jak miescy pamiaci», jaki prajšoŭ u Dziaržaŭnym litaraturnym muziei Janki Kupały 18 krasavika, u Mižnarodny dzień pomnikaŭ i histaryčnych miaścin. Udzielniki mierapryjemstva inicyjatyvu Łakizy padtrymali.
Kruhły stoł byŭ arhanizavany Ministerstvam kultury, Instytutam kultury Biełarusi, Biełaruskim kamitetam Mižnarodnaha savieta pa zachavańni pomnikaŭ i słavutych miaścin (ICOMOS) i fondam «Kulturnaja spadčyna i sučasnaść».
Pradstaŭnik Biełaruskaha kamiteta Mižnarodnaha savieta muziejaŭ (ICOM) Ała Staškievič, jakaja vystupiła maderataram sustrečy, adznačyła, što
na bližejšaj kanfierencyi akcent pavinien rabicca na pytańni «miescaŭ pamiaci, prablem uviekaviečańnia i miemaryjalizacyi, kryteryjaŭ invientaryzacyi abjektaŭ».
Padrychtoŭkaj da hetaha mižnarodnaha forumu zojmiecca rabočaja hrupa, stvoranaja pry ŭdziele pradstaŭnikoŭ Ministerstva adukacyi, Ministerstva sportu i turyzmu, Nacyjanalnaj akademii navuk i ź inšych zacikaŭlenych orhanaŭ. «Važna, kab heta było na mižnarodnym uzroŭni, pakolki isnujuć zamiežny vopyt i mietodyki, — padkreśliła Staškievič. — Dla nas važna dałučycca da hetaha vopytu. Prablemy, źviazanyja ź niekropalami, u nas nie vypracavanyja na mietadałahičnym uzroŭni, tamu važna pačuć zamiežnych ekśpiertaŭ».
Namieśnik ministra kultury Alaksandr Jacko adznačyŭ, što pytańniam achovy pomnikaŭ i histaryčnych miaścin ministerstva advodzić značnuju rolu. Pavodle jaho słoŭ, u Dziaržaŭnym śpisie historyka-kulturnych kaštoŭnaściaŭ naličvajecca bolš jak 5,5 tysiač abjektaŭ spadčyny, pravodzicca praca pa jaho aptymizacyi. Ministerstva pracuje nad stvareńniem i dapaŭnieńniem dziejnych narmatyŭnych aktaŭ, jakija datyčacca historyka-kulturnaj spadčyny, u tym liku pracuje nad prajektam Kodeksa ab kultury.
«Viadziecca vielmi aktyŭnaja praca, skiravanaja na toje, kab spynić tak zvanych čornych kapalnikaŭ. My taksama kantralujem vykanańnie zakanadaŭstva pa achovie historyka-kulturnaj spadčyny, u hetym nam dapamahajuć śviadomyja hramadzianie, jakich heta pytańnie chvaluje», — skazaŭ čynoŭnik.
-
Karcina Šahała «Prahułka» zastaniecca ŭ Biełarusi da kastryčnika: Turčyn damoviŭsia ź Mišuścinym ab praciahu vystavy
-
Na «Biełaruśfilmie» siarod biaskoncych filmaŭ pra vajnu narešcie zdymuć navahodniuju kamiedyju
-
Zamianiŭ 95% trupy, ale nie zavajavaŭ publiku. Što robić ź biełaruskim baletam eks-premjer rasijskaj Maryinki
Kamientary