Rasijskaje dziaržahienstva RIA «Naviny», jakim kiruje Dźmitryj Kisialoŭ i jakoje vykarystoŭvajecca dla prapahandy Kramla, raspaŭsiudziła ranicaj 20 krasavika paviedamleńnie ab stralbie ŭ vakolicach Słavianska i niekalkich zahinuŭšych.
U pryvatnaści, sa spasyłkaj na adnaho z kiraŭnikoŭ «narodnaha apałčeńnia Słavianska» RIA paviedamlaje ab pierastrełcy na adnym z błokpastoŭ, u jakoj byli zabityja troje žycharoŭ horada.
Akramia taho, telekanał « Rasija 24» sa spasyłkaj na ŭłasnaha karespandenta taksama paviedamiŭ, što byli zabityja dva napadniki.
Paźniej RIA «Naviny» pieradało paviedamleńnie lekara centralnaj balnicy Słavianska, jaki paćvierdziŭ hibiel adnaho čałavieka i ranieńni dvuch u načnoj pierastrełcy.
Rasijskaje ŚMI spasyłajecca na zajavu «narodnaha mera» Słavianska Viačasłava Panamarova, jaki zajaviŭ, što kala 2:00 nočy da błokpostu ŭ rajonie sieła Byłbasoŭka na ŭjeździe ŭ Słaviansk padjechali nieviadomyja na čatyroch pazadarožnikach. Jany adkryli ahoń pa apałčencach, jakija śviatkavali na barykadach Vialikdzień.
«Dziažurnym udałosia vyklikać padmacavańnie z horada. 20 bajcoŭ apałčeńnia ŭstupili ŭ pierastrełku z napadnikami. Dva pazadarožniki byli mocna paškodžanyja. Apałčency paviedamili taksama, što vyjavili ŭ ich hilzy i vybuchoŭku zamiežnaj vytvorčaści, simvoliku «Pravaha siektara» i kartu Słavianska z abviedzienym miescaznachodžańniem televiežy, jakuju napiaredadni zachapili apałčency, kab uklučyć rasijskija telekanały», — zajaviŭ RIA «Naviny» Panamaroŭ.
Pavodle jaho słoŭ, prychilniki fiederalizacyi ahniom likvidavali i paranili da siami napadnikaŭ.
U svaju čarhu rasijskaje ahienctva RBK paviedamiła, što namieśnik kiraŭnika «Narodnaha apałčeńnia Danbasa» Siarhiej Cypłakoŭ nie paćvierdziŭ infarmacyju ab stralbie, a hetyja čutki jon ličyć iłžyvymi.
Kamientary