Padčas narady pa kadravych pytańniach 2 maja Alaksandr Łukašenka pacikaviŭsia ŭ ministra zamiežnych spraŭ Uładzimira Makieja, nakolki patrebnyja i aktualnyja ciapierašnija pryznačeńni i ci pryniasie heta istotnuju karyść dla krainy.
«Chaciełasia b, kab pasły pryznačalisia ŭžo, mahčyma, pad niejkuju kankretnuju prahramu abo śledam za hetaj prahramaj», — cytuje kiraŭnika dziaržavy jaho pres-słužba. Łukašenka zaznačyŭ, što, mahčyma, «lepš nie śpiašacca adkryvać pasolstvy i pryznačać pasłoŭ tam, dzie im rabić niama čaho budzie».
Makiej źviarnuŭ uvahu, što ŭsie kiraŭniki biełaruskich dypmisij, jakija pryznačajucca za miažoj, źjaŭlajucca «adkaznymi i pierśpiektyŭnymi rabotnikami ŭ sistemie MZS».
Ministr pahadziŭsia z tym, što pasłoŭ varta pryznačać pad pierśpiektyŭnaje raźvićcio adnosinaŭ z toj ci inšaj krainaj.
«Nahladnym prykładam tut źjaŭlajecca Ekvador», — paviedamlaje pres-słužba.
Pavodle słoŭ Makieja, kali raniej u Biełarusi z Ekvadoram praktyčna nie było nijakaha tavaraabarotu, to letaś jon skłaŭ 28 młn. dołaraŭ ZŠA. Ministr pryznaŭ, što heta nievialikaja ličba, adnak u dźviuch krain jość kankretnyja pierśpiektyŭnyja prahramy. «Ekanomika Ekvadora padobnaja da vieniesuelskaj, i jość hatoŭnaść našych ekvadorskich partnioraŭ pa raźvićci ŭzajemavyhadnych sumiesnych prajektaŭ ź Biełaruśsiu. My heta budziem rabić. Da taho ž z Ekvadora my akredytujem pasła pa sumiaščalnictvie na niekalki susiednich krain», –- zaznačyŭ kiraŭnik MZS.
«Što da Manholii, to z hetaj krainaj za apošnija dva hady adznačajecca stabilny ŭzrovień źniešniaha handlu, niahledziačy na drennuju mižnarodnuju finansava-ekanamičnuju situacyju. Aprača taho, u dźviuch krain jość pierśpiektyŭnyja prahramy pa pastaŭkach karjernaj techniki, pa supracoŭnictvie ŭ śfiery sielskaj haspadarki i pastaŭkach sielhastechniki i abstalavańnia. Pryčym užo viadziecca kankretnaja praca», — paviedamlaje pres-słužba.
Kažučy pra Niderłandy, Makiej źviarnuŭ uvahu na tradycyjna vysoki ŭzrovień tavaraabarotu ŭ bolš jak 3 młrd. dołaraŭ. Pryčym navat biez uliku nafty, naftapraduktaŭ i kalijnych uhnajeńniaŭ, sioleta nazirajecca rost dvuchbakovaha handlu ŭ dva razy. Da taho ž ź Niderłandaŭ u Biełaruś aktyŭna iduć inviestycyi, jakija składajuć sotni miljonaŭ dołaraŭ. U Niderłandach taksama znachodzicca štab-kvatera Arhanizacyi pa zabaronie chimičnaj zbroi, ź jakoj Biełaruś ciesna supracoŭničaje i vybrana letaś u skład kiraŭnictva.
«Što da inšych krain, to my pastajanna analizujem pracu našych zamiežnych ustanoŭ. Napeŭna, pavinien ščyra pryznać, usio-taki my nie zaŭsiody praličvajem niejkija varyjanty pry pryznačeńni tych ci inšych kiraŭnikoŭ zamiežnych ustanoŭ, ale važna svoječasova bačyć niedachopy i vypraŭlać ich», — zaznačyŭ ministr zamiežnych spraŭ.
Łukašenka padkreśliŭ, što jaho asnoŭnym patrabavańniem źjaŭlajecca pastajannaja dynamika ŭ adnosinach z toj ci inšaj krainaj.
«Kali ŭžo pryznačyli, napeŭna, dumali pra niejkija pierśpiektyvy. Usio roŭna pasłu daviadziecca tam napružvacca i davać vynik. Niachaj pastupova, niachaj spakojna, ale dynamika pavinna być stanoŭčaja.
Heta dla nas vielmi važna. Kali, da prykładu, u toj ža Arhiencinie vialiki front pracy, pierśpiektyŭnaja kraina, tam zaŭsiody možna znajści prykładańnie namahańniaŭ našaj Biełarusi. Tamu pasoł pavinien varušycca. Hetaksama i ŭ Brazilii. Brazilija — hihanckaja kraina, vielizarnaja pa ščylnaści, i kali my tam nie majem dobraj dynamiki, značyć, treba raźbiracca z pasłom», — miarkuje kiraŭnik dziaržavy.
«Ale hałoŭnaja zadača — heta ekanomika, — zaznačyŭ Łukašenka. — Budzie ekanomika — zaŭsiody budzie kraina i niezaležnaj,
i vam budzie mahčymaść zaŭsiody viarnucca ŭ svoj rodny dom, vy budziecie viedać, što jość kavałak ziamli, dzie buduć žyć vašy dzieci. Heta zaležyć, u pryncypie, siońnia ŭsio ad pasłoŭ».
Kamientary