Stvaralniki siomaha epizodu «Zornych vojnaŭ», jaki vyjdzie ŭ suśvietny prakat u śniežni 2015 hoda, nie pierastajuć ździŭlać prychilnikaŭ sahi navinami. Tak, aficyjna abvieščana, što da akciorskaha składu dałučylisia dźvie aktrysy: oskaranosnaja hierainia filma «12 hadoŭ rabstva» Łupita Ńjonha i vykanaŭca roli Bryjeny ŭ sieryjale «Hulnia tronaŭ» Hviendalin Kryści.
Ab udziele Łupity Ńjonha ŭ zornaj sazie chadzili čutki z pačatku 2014 hoda, adnak tolki ciapier źjaviłasia paćvierdžańnie hetaj infarmacyi na aficyjnym sajcie «Zornych vojnaŭ». Pra toje, jakija roli dastanucca talenavitym aktrysam, pakul nie paviedamlajecca.
Režysior siomaha epizodu Džej Džej Abrams. Zdymki filma ŭžo pačalisia, jany prachodziać na dvuch asnoŭnych zdymačnych placoŭkach — łondanskaj studyi Pinewood i ŭ Abu-Dabi. Siužet filma trymajuć u sakrecie. Jak miarkujecca, dziejańnie epizodu budzie adbyvacca praz 30 hadoŭ paśla «Viartańnia džedaja», a ŭ centry padziej apynucca «troje maładych hierojaŭ».
Zaraz kienijskaja aktrysa Łupita Ńjonha znachodzicca na piku svajoj karjery. Prasłaviłasia dziaŭčyna dziakujučy ŭdziełu ŭ histaryčnaj dramie «12 hadoŭ rabstva». Za rolu rabyni Petsi jana atrymała premiju «Oskar». Akramia taho, u 31 hod ciemnaskuraja aktorka stała samaj pryhožaj žančynaj 2014 hoda pa viersii časopisa People.
Kamientary