Łukašenka — kiraŭnikam orhanaŭ biaśpieki i śpiecsłužb SND: Nas sprabujuć raźjadnać, nackoŭvajuć

Novyja vykliki i pahrozy patrabujuć maksimalnaha vykarystańnia intehracyjnych mahčymaściej SND dla ŭmacavańnia biaśpieki.

Ab hetym zajaviŭ Alaksandr Łukašenka siońnia na sustrečy z kiraŭnikami delehacyj, jakija prymajuć udzieł u 36-m pasiadžeńni Savieta kiraŭnikoŭ orhanaŭ biaśpieki i śpiecyjalnych słužbaŭ dziaržaŭ — udzielnic SND.

Jak adznačyŭ Łukašenka, Biełaruś 5 hadoŭ tamu prymała ŭžo ŭdzielnikaŭ pasiadžeńnia Savieta kiraŭnikoŭ orhanaŭ biaśpieki i śpiecsłužbaŭ. «Za hetyja hady adbylisia vielmi surjoznyja źmianieńni jak u śviecie, tak i ŭ samoj Sadružnaści, u sistemach hłabalnaj i rehijanalnaj biaśpieki», - skazaŭ biełaruski lidar.

Alaksandr Łukašenka sa škadavańniem adznačyŭ skaračeńnie ŭdzielnikaŭ sustreč, kiraŭnikoŭ śpiecsłužbaŭ SND, što abumoŭlena vychadam Hruzii z Sadružnaści. Ab takich namierach zajaŭlaje taksama Ukraina.

«Tym nie mienš, novyja vykliki i pahrozy nastojliva patrabujuć kaardynacyi našych ahulnych namahańniaŭ i maksimalnaha vykarystańnia intehracyjnych mahčymaściej Sadružnaści dla ŭmacavańnia biaśpieki krain-udzielnic», - padkreśliŭ jon.

«Siońnia nas sprabujuć raźjadnać, nackavać adzin na adnaho, vykarystoŭvajučy lubyja padstavy, uklučajučy skažeńnie historyi.

Meta zrazumiełaja - treba vykaranić ahulnuju pamiać ab tym, chto pieramoh u Vialikaj Ajčynnaj vajnie, chto vyzvaliŭ Jeŭropu ad fašyzmu, stvaryć umovy dla novaha pieradziełu śvietu, zaćvierdziŭšy svajo panavańnie ŭ roznych častkach płaniety», - skazaŭ kiraŭnik dziaržavy.

Pavodle słoŭ Alaksandra Łukašenki, apošnim časam tradycyjnyja mižnarodnyja instytuty harantavańnia biaśpieki, na žal, nie zaŭsiody zdolny efiektyŭna procistajać hłabalnym vyklikam. Pryčym hetyja pahrozy nie mohuć być niejtralizavany na ŭzroŭni asobnych dziaržaŭ, procidziejničać im mahčyma tolki šlacham kansalidacyi namahańniaŭ. I asablivaja rola ŭ hetym pracesie adviedziena śpiecsłužbam, ich umieńniu analizavać i prahnazavać raźvićcio isnujučaj abstanoŭki.

«Nam nie treba zvonku čakać efiektyŭnych receptaŭ procidziejańnia vyklikam i pahrozam rehijanalnaj biaśpiecy. My ŭ adkazie za stabilnaść na našych ziemlach i pavinny farmiravać sumiesnyja miechanizmy reahavańnia na destabilizujučyja faktary», - padkreśliŭ biełaruski lidar.

Alaksandr Łukašenka ŭpeŭnieny, što ŭ farmacie SND mienavita śpiecsłužby pryznačany vyjaŭlać ryzyki, vykliki i pahrozy kalektyŭnaj biaśpiecy, stvarać umovy dla spakojnaha i paśpiachovaha raźvićcia Sadružnaści ŭ cełym i kožnaj dziaržavy ŭ pryvatnaści. Pryčym raźvićcia pastupalnaha, biez šokavaj terapii i sacyjalnych uzrušeńniaŭ.

Łukašenka adznačyŭ, što biełaruski bok hatovy padzialicca svaim vopytam zabieśpiačeńnia biaśpieki maštabnych mierapryjemstvaŭ. «My heta prademanstravali i na praviedzienym spartyŭnym mierapryjemstvie i dakazali ŭsiamu śvietu, što zdolny pravodzić takija suśvietnyja forumy. Upeŭnieny, što hety vopyt budzie zapatrabavany našymi azierbajdžanskimi siabrami pry praviadzieńni Pieršych Jeŭrapiejskich hulniaŭ u nastupnym hodzie ŭ Baku», - skazaŭ kiraŭnik dziaržavy.

Alaksandr Łukašenka taksama padkreśliŭ, što hłabalnaja niestabilnaść abumoŭlivaje nieabchodnaść naroščvańnia sumiesnych namahańniaŭ u baraćbie ź mižnarodnym teraryzmam, ekstremizmam, transnacyjanalnymi destruktyŭnymi farmiravańniami, złačynstvami ŭ halinie vysokich technałohij. «Asablivuju važnaść u hetym śpisie nabyvaje prablema mižnarodnaha teraryzmu. Jaho ačahi najbolš trahična prajaŭlajucca na Blizkim Uschodzie, u Afrycy. Adnak usio bolš aktyŭna ekstremisckija idei pranikajuć u Jeŭropu i, na žal, u krainy Sadružnaści, - kanstatavaŭ Alaksandr Łukašenka. - Terarystyčnyja prajavy pravakujuć maštabnyja sacyjalnyja kanflikty, nanosiać uron miždziaržaŭnym adnosinam, destabilizujuć hramadska-palityčnuju situacyju. Destruktyŭnyja arhanizacyi vykarystoŭvajucca dla razbureńnia ekanomiki cełych dziaržaŭ. Tamu nam nieabchodny hłyboki analiz i efiektyŭnaje vyjaŭleńnie terarystyčnych pahroz, niedapuščeńnie praniknieńnia hetaj čumy ŭ krainy SND».

Prezident taksama zaklikaŭ źviarnuć pilnuju ŭvahu na pytańni baraćby z karupcyjaj: «My bačym, da jakich razburalnych nastupstvaŭ moža pryvieści tatalnaja karupcyja, uźviedzienaja ŭ ranh dziaržaŭnaj palityki, na prykładzie, u tym liku, našych bližejšych susiedziaŭ».

• 0
• 0
• 0
• 0
• 0
• 0
• 0
• 0