Biełaruskaj «Krambambuli» bolš nie budzie

Lehiendarny biełaruski napoj «Krambambula» ad adnaho z najstarejšych pryvatnych vytvorcaŭ «BiełPI» źnik z palicaŭ kramaŭ. Užo paŭhoda nie abnaŭlałasia infarmacyja na sajcie kampanii.

Pavialičyć

 Telefanavańnie na pradpryjemstva dało niečakany vynik:

— Heta «BiełPI»?

— Tak.

— A ŭ vas «Krambambula» vypuskajecca?

— Nie.

— A čamu?

— Padatkami zadušyli. Heta biessensoŭna.

— I bolš nia budzie?

— My spynili vytvorčaść alkaholu. Bolš hetym nie zajmajemsia.

«Krambambulu» — «Panskuju», «Chlebasolnuju», «Palaŭničuju», «Ščodruju» i «Siardzituju» — vypuskaje kampanija «BiełPI». Jana była zasnavanaja jašče ŭ 1993 hodzie siamjoj piśmieńnika Leanida Dajnieki — aŭtara ramanaŭ «Mieč kniazia Viački» i «Śled vaŭkałaka». Kirujuć biznesam jahonyja syny Źmicier, Siarhiej i Ściapan. Aproč «Krambambuli», kampanija vypuskała viadomuju harełku «Hienerał».

Siarhiej Dajnieka paviedamiŭ Radyjo Svaboda, što z-za niazručnaj schiemy padatkaabkładańnia vytvorčaść u Biełarusi sapraŭdy daviałosia spynić.

«Z 1 śniežnia firma «BiełPI» trapiła ŭ śpis pradpryjemstvaŭ, jakija spłočvajuć padatak nie praz 90 dzion paśla adhruzki, a praz 30. U Biełarusi niama sensu nam vytvorčaściu zajmacca. Tamu tut my spynilisia i pieranosim jaje, najchutčej, u Italiju»

Dajnieka spadziajecca, što da kanca hodu pradukcyja pad brendam «Krambambula» źjavicca ŭ biełaruskich kramach znoŭku. Ale heta budzie ŭžo nie biełaruskaja, a italjanskaja vytvorčaść.

«Sam handlovy znak, nazva naležać našaj siamji. Heta biełaruski brend. I ŭvieś sens vytvorčaści byŭ, kab być u Biełarusi. Bo my amal 70 pracentaŭ pradukcyi pradavali ŭ Eŭropie, nam navat tam praściej».

Dajnieki zajmali admietnaje miesca na alkaholnym rynku. Ichnyja napoi pazycyjanavalisia jak vyklučna biełaruski pradukt, a ŭ reklamie vykarystoŭvałasia tolki biełaruskaja mova.

Za dosyć karotki čas Dajnieki zmahli zrabić plašku «Krambambuli» ci nie hałoŭnym suveniram ź Biełarusi.

Sami biełaruskamoŭnyja i nacyjanalna aryjentavanyja, Dajnieki pryciahvali da pracy adpaviednych ludziej. Tak, dyzajn plašak «BiełPI» ŭ svoj čas rabiŭ mastak Michał Aniempadystaŭ.

 «Aproč «Krambambuli» jašče byŭ šerah praduktaŭ, dzie vykarystoŭvalisia biełaruskija kulturnyja kody. Jany spačatku vypuskali harełku «Hienerał», a paśla zrabili rebrendynh i stali vypuskać jaje pad nazvaj «Hienerał Kaściuška». Da apošniaha času jašče možna było znajści hetuju harełku, — raspaviadaje Aniempadystaŭ. — I «Krambambulu» spačatku vypuskali dvuch hatunkaŭ: «Klasyčnuju» i «Damskuju», zdajecca. A paźniej jany raspracavali ceły šerah aryhinalnych receptaŭ. To bok aproč taho, što jany prosta zvyčajnuju harełku rabili, rabili jašče i aryhinalnyja kalarovyja, što, u pryncypie, dla biełaruskaj kultury tradycyjna».

Aniempadystaŭ zaznačaje, što eksperymenty z harełkavymi receptami — heta ŭžo sa sfery kultury spažyvańnia alkaholu.

«Kalarovyja harełki i robiacca nacyjanalnym praduktam, vizytoŭkaj krainy. Jak «Jehiermajstar» u niemcaŭ. I heta nia vielmi staryja recepty, a zvyčajna raspracavanyja paśla vajny, — kaža Aniempadystaŭ. — A «BiełPI» sapraŭdy zrabili technalahičny praryŭ. Kalarovych harełak nia tak šmat. Zhadajcie, što jašče ŭ Savieckim Sajuzie była stvoranaja «Biełavieskaja», i jana dahetul pratrymałasia».

Aniempadystaŭ dadaje, što «Krambabula» mieła ŭsie šancy nabyć status nacyjanalnaha praduktu. Da taho ž nazva jaje padtrymlivałasia šeraham kulturnickich prajektaŭ.

Historyja «Krambabuli», harełki ź miodam i specyjami, pačynajecca jašče ŭ šasnaccatym stahodździ. Dziakujučy namahańniam entuzijastaŭ i papularnaści muzyčnaha prajektu «Krambambula», napoj u dvaccać pieršym stahodździ nabyŭ u Biełarusi status lehiendarnaha.

Ci stanie biełaruskim nacyjanalnym praduktam italjanskaja «Krambambula» i ci ahułam vierniecca hety napoj u Biełaruś, zastajecca tolki čakać.

• 0
• 0
• 0
• 0
• 0
• 0
• 0
• 0