Amal 300 artystaŭ Nacyjanalnaha akademičnaha Vialikaha teatra opiery i baleta Biełarusi prymuć udzieł u štohadovym fiestyvali «Viečary Vialikaha teatra ŭ zamku Radziviłaŭ», jaki projdzie ŭ Niaśvižy 20-22 červienia. Ab hetym siońnia ŭ čas videabryfinhu paviedamiŭ hienieralny dyrektar teatra Uładzimir Hrydziuška.
Vysokaje mastactva publicy prademanstrujuć opiernyja vykanaŭcy, artysty baleta, simfaničny arkiestr i chor. Muzyčnaje śviata projdzie na niekalkich placoŭkach: va ŭnutranym dvary i teatralnaj zale zamka, haradskoj Ratušy, a taksama kaściole Božaha Cieła.
Dla vystupleńniaŭ va ŭnutranym dvary dadatkova abstalujuć dźvie sceny — dla artystaŭ i arkiestrantaŭ, a taksama miescy dla hledačoŭ. Čakajecca, što pahladzieć śpiektakli zmohuć 1,5 tys. čałaviek.
U hetym hodzie arhanizatary padrychtavali niekalki premjer. Amatary opiery zmohuć atrymać asałodu ad šedeŭra Antonia Saljery «Spačatku muzyka, potym słovy», a pakłońniki chareahrafičnaha mastactva ŭbačać premjeru hetaha teatralnaha siezona — viečar baleta «Sa stahodździa ChICh u stahodździe XXI».
Adkryje prahramu fiestyvalu kancert strunnaha kvinteta «Sierenada» — «Miełodyi kachańnia», jaki projdzie ŭ teatralnaj zale zamka. Salistka opiery Taćciana Traćciak u supravadžeńni virtuoznych muzykantaŭ vykanaje viadomyja ramansy i papularnyja muzyčnyja kampazicyi roznych hadoŭ. U kaściole Božaha Cieła artysty choru i salisty opiernaj trupy teatra pradstaviać kancert z tvoraŭ Stanisłava Maniuški «Z Ojčam adviečnym».
Upieršyniu ŭ Niaśvižy (unutrany dvor) pakažuć «Karmen» Žorža Bize — znakavy dla teatra śpiektakl. Mienavita z hetaj pastanoŭki ŭ 1933 hodzie i pačałasia historyja Vialikaha. Tady partyju niepakornaj cyhanki vykanała vialikaja Łarysa Aleksandroŭskaja.
Zavieršycca muzyčny marafon hała-kancertam zorak Vialikaha teatra. U prahramie - papularnyja aryi, charavyja sceny, kuplety i duety z załatoha fondu suśvietnaj opiery, a taksama samyja jarkija frahmienty, pa-de-de, adažya i varyjacyi sa słavutych baletaŭ.
Fiestyval «Viečary Vialikaha teatra ŭ zamku Radziviłaŭ» projdzie piaty raz. Prajekt startavaŭ u 2010 hodzie pa inicyjatyvie teatra i pry padtrymcy Ministerstva kultury Biełarusi.
Kamientary