Baranavickaja školnica pieramahła na mižnarodnaj alimpijadzie pa rasiejskaj movie z sačynieńniem pra biełaruskuju movu
Na mižnarodnaj alimpijadzie pa rasiejskaj movie pieramahła baranavickaja dzieviacikłaśnica, jakaja napisała sačynieńnie… pra biełaruskuju movu! I pastupiła ŭ rasijskuju VNU za dva hady da pastupleńnia, apaviadaje hazieta Inteks-pres.
Mižnarodnaja alimpijada pa rasiejskaj movie dla krain SND, Bałtyi, Hruzii, Abchazii i Paŭdniovaj Asiecii prajšła ŭ Maskvie z 23 pa 27 červienia. U kamandu Biełarusi ŭvajšli 10 čałaviek, u tym liku vypusknica 9 kłasa baranavickaj himnazii №2 Julija Jemieljanovič.
U alimpijadzie było try abaviazkovyja etapy — sačynieńnie, vusny linhvistyčny i ispyt pa rasiejskim krainaznaŭstvie.
Julija nabrała najvyšejšy bał u svajoj kamandzie i stała adnoj ź piaci pieramožcaŭ u naminacyi «absalutny pieramožca».
Cikava, što baranavickaja ŭdzielnica na alimpijadzie pa rasiejskaj pisała sačynieńnie… pra biełaruskuju movu.
«Ja vybrała volnuju temu «Ja chaču raskazać vam pra…» i pisała pra biełaruskuju movu. Dla mianie heta blizkaja tema, ja raspaviadała ŭ sačynieńni pra fanietyčnyja asablivaści, pra historyju movy, reformy, pra toje, što ŭ joj jość dva ałfavity, dźvie arfahrafičnyja sistemy, a taksama pra sučasnuju papularyzacyju siarod moładzi i intelihiencyi», — raspaviała Julija.
U hetym hodzie dziaŭčyna naviedvała biełaruskamoŭnyja kursy «Mova nanova» u Baranavičach, pačała razmaŭlać pa-biełarusku. Zrešty, jana zachaplajecca i inšymi movami.
«Ja vyvučaju rasiejskuju, anhlijskuju, niamieckuju, polskuju, liču, što movy vielmi važnyja. Jak kazaŭ Valter, «viedać šmat moŭ — značyć mieć šmat klučoŭ da adnaho zamka», — kaža jana.
Za pieramohu Jula atrymała mahčymaść biaspłatna vučycca ŭ luboj rasiejskaj VNU. Jana kaža, što chutčej za ŭsio, skarystajecca hetym, adnak źjazdžać nazaŭždy ź Biełarusi nie choča.
«Plus u tym, što Rasija ŭvachodzić u Bałonski praces, i moj dypłom budzie kaciravacca va ŭsim śviecie. Paśla univiersiteta ja b chacieła pajechać papracavać u Jeŭropie, a potym viarnucca ŭ Biełaruś, ažyćciaŭlać i raźvivać kulturnyja idei, naprykład, papularyzacyi biełaruskaj movy jak srodku mižsłavianskich znosin», — kaža Julija.
Ciapier čytajuć
Staŭ viadomy prysud eks-pamočniku Łukašenki Iharu Bryło2
Kamientary