U Biełarusi stvarajecca Adzinaja baza danych donarstva kryvi i jaje kampanientaŭ. Heta praduhledžana źmienami, uniesienymi ŭ zakon «Ab donarstvie kryvi i jaje kampanientaŭ», paviedamlaje Nacyjanalny pravavy internet-partał.
U bazu buduć uniesienyja źviestki, jakija dazvalajuć ustanavić asobu donara i recypijenta; źviestki ab posttransfuzijonnych reakcyjach i ŭskładnieńniach (nastupstvach pieralivańnia kryvi, jaje kampanientaŭ); ab abjomach narychtavanaj kryvi i jaje kampanientaŭ; ab zapasach kryvi, jaje kampanientaŭ u kankretnych arhanizacyjach achovy zdaroŭja, miedycynskich navukovych arhanizacyjach z ukazańniem hrupy kryvi, rezus-prynaležnaści, fienatypu; ab asobach, u jakich vyjaŭlenyja miedycynskija supraćpakazańni dla zdačy kryvi i jaje kampanientaŭ; inšyja źviestki, vyznačanyja Ministerstvam achovy zdaroŭja.
Zhodna z dapaŭnieńniami, uniesienymi u art. 17 zakona ab donarstvie, najmalnik abaviazany bieśpieraškodna adpuskać rabotnika ŭ dzień vykanańnia donarskaj funkcyi, a ŭ vypadku niemahčymaści z-za vytvorčych pryčyn — prapanavać inšy dzień, vybrany pavodle ŭzhadnieńnia z rabotnikam (za vyklučeńniem vypadkaŭ vykanańnia donarskaj funkcyi ŭ ekstrannym paradku ŭ metach zachavańnia žyćcia i zdaroŭja recypijenta).
Akramia taho, u novaj redakcyi vykładzieny art. 31 zakona, jaki kankretyzuje paradak vypłaty donaru siaredniaha zarobku, davańnia jamu dadatkovaha dnia adpačynku ŭ vypadku zdačy kryvi na biazvypłatnaj asnovie ŭ vychadnyja, śviatočnyja dni, dni adpačynku, inšyja dni i inš.
Zakon taksama dapoŭnieny art. 31.1 ab zdačy kryvi i jaje kampanientaŭ na biazvypłatnaj asnovie. U pryvatnaści nahrudny znak «Hanarovy donar Respubliki Biełaruś», jaki praduhledžvaje šerah ilhot, vydajecca pry zdačy na biazvypłatnaj asnovie nie mienš jak 20 danacyj kryvi abo 40 danacyj płazmy, lejkacytaŭ, trambacytaŭ. Dla atrymańnia takoha znaka na płatnaj asnovie nieabchodna zdać nie mienš jak 40 danacyj kryvi abo 80 danacyj płazmy, lejkacytaŭ, trambacytaŭ.
Asnoŭnyja źmieny ŭ zakon nabyvajuć moc praz šeść miesiacaŭ paśla jaho aficyjnaha apublikavańnia, jakoje adbyłosia 11 studzienia.
Kamientary