Vočy, vušy i zuby: novaja vyviednaja broniemašyna zadavoliła brytanskich vajskoŭcaŭ
Bazavaja mašyna prahramy pa pieraŭzbrajeńni brytanskaj armii novym pakaleńniem vyviednaj braniatechniki atrymała «zialonaje śviatło», piša defensenews.com sa spasyłkaj na Ministerstva abarony Brytanii.
Scout SV raspracoŭki brytanskaha adździaleńnia kampanii General Dynamics budzie płatformaj dla cełaha siamiejstva techniki, u tym liku kamandnaj mašyny, bronietransparciora, mašyny inžyniernaj vyviedki i ramontna-evakuacyjnaj mašyny.
Braniravanaja mašyna vyviedki maje akustyčnyja detektary, łaziernuju sistemu papiaredžańnia, srodki radyjoelektronnaj baraćby, taktyčny kampjutar. Adkrytaja architektura dazvolić ekipažu atrymlivać, pierapracoŭvać, zachoŭvać i pieradavać da 6 terabajtaŭ infarmacyi.
Asnoŭnaje ŭzbrajeńnie — 40 mm puška — raspracavanaja brytanska-francuzskaj kampanijaj CTA International. Asablivaściu hetaj harmaty źjaŭlajecca kampaktnaść z-za navatarskaj kanstrukcyi zatvora, a taksama vykarystańnie tak zvanych teleskapičnych bojeprypasaŭ.
Paražajučy elemient u takim bojeprypasie ŭtopleny ŭ hilzu z vyšybnym zaradam, što daje mahčymaść padvysić dalnaść stralby i dazvalaje ekanomić miesca. Padkalibierny braniabojny snarad 40 mm puški CTA International prabivaje bolš za 140 mm katanaj hamahienaj brani na adlehłaści ŭ 1500 m. Takim čynam, pa mierkavańni kampanii, puška moža ŭ łob prabić lubuju broniemašynu i navat tank T-55.
Ciapier Brytanija płanuje nabyć 589 mašyn Scout SV u roznych madyfikacyjach za £3,5 młrd ($5,3 młrd). U 2020 hodzie pieršaja bryhada brytanskaj armii budzie całkam pieraŭzbrojenaja novaj technikaj.
Kamientary