Usiaho-ta treba źniać 140-chvilinny film z 45-hadovym hierojem i 38-hadovaj hierainiaj.
Daśledčyki praanalizavali pieramožcaŭ premii Nacyjanalnaj kinaakademii ZŠA z 1965 hoda. Ich vyniki — drennyja naviny dla Edździ Redmejna, jakoha nazyvajuć hałoŭnym pretendentam na «Oskar» za najlepšaha aktora, piša Yahoo News.
Pa vykinach daśledavańnia, najvialikšyja šancy na pieramohu majuć filmy praciahłaściu 140 chvilin, aktory ŭzrostam u 45 hod i aktorki ŭzrostam 38 hod.
Pavodle daśledavańnia, najlepšyja šancy majuć 38-hadovaja Ryz Uizierspun (hałoŭnaja rola ŭ «Dzikaj») i 40-hadovy Bredli Kupier (hałoŭnaja rola ŭ «Amierykanskim snajpiery»). Pa chronamietražy siarod filmaŭ najlepšy kandydat — «Amierykanski snajpier».
Miedyjamahnat Mark Pirsan, jaki jość zamoŭcam daśledavańnia, adznačaje, što da vynikaŭ treba stavicca z humaram — takija analizy mohuć stać dobraj nahodaj dla abmierkavańniaŭ i dapamohuć skaratać čas da cyrymonii, što adbudziecca 22 lutaha.
Praŭda, inšy amatar statystyki, Ben Zaŭźmier, praročyć pieramohu «Biordmenu», Edździ Redmejnu i Džulijanie Mur.
Jon śćviardžaje, što jaho matematyčnaja madel paśpiachova pradkazvaje da 75% pieramožcaŭ štohod. Madel vykarystoŭvaje adkrytyja źviestki — mierkavańni krytykaŭ dy pieramohi i naminacyi na inšych premijach.
Pavodle jaho madeli, ź imaviernaściu ŭ 55,6% najlepšym režysioram pryznajuć Alechandra Hanzalez Ińjarytu za film «Biordmen», hety ž film atrymaje «Oskar» za najlepšy scenar ź imaviernaściu 44,3%, najlepšym multfilmam ź imaviernaściu 45,6% stanie «Jak pryručyć drakona-2», a najlepšym filmam na zamiežnaj movie — polskaja «Ida», imaviernaść 56,3%.
Zbolšaha, ale nie zaŭsiody, mienavita vyniki Zaŭźmiera padobnyja da stavak u bukmiejkierskich kantorach.
Kamientary