Minski repietytar vyjhraŭ sud u Respublikanskaha instytuta kantrolu viedaŭ
4 sakavika ŭ sudzie Frunzienskaha rajona vyniesiena rašeńnie pa spravie minskaha repietytara Alaksieja Vasileŭskaha. Respublikanski instytut kantrolu viedaŭ zapatrabavaŭ spahnać ź jaho štraf za parušeńnie aŭtarskich pravoŭ — publikacyju ŭ internecie rašeńnia zadač repietycyjnaha testavańnia. Adnak sud nie ŭhledzieŭ parušeńniaŭ u dziejańniach adkazčyka.
Alaksiej Vasileŭski ŭžo niekalki hadoŭ akazvaje pasłuhi repietytara pa fizicy i matematycy. Aprača asnoŭnaj padrychtoŭki svaich vučniaŭ jon taksama vykładvaje ŭ internet rašeńnie zadač, rekamiendacyi, jak pravilna prachodzić testavańnie.
Respublikanski instytut kantrolu viedaŭ (RIKV), jaki pravodzić testavańnie, nie zadavalniaje, što ŭ internecie pajaŭlajucca prykłady zadač z testa, a taksama ich rašeńnie. Pradstaŭniki instytuta patrabavali aštrafavać minskaha repietytara pa art. 9.21 KoAP (niezakonnaje raspaŭsiudžvańnie ci inšaje niezakonnaje vykarystańnie abjektaŭ aŭtarskaha prava).
«Jon robić heta z karyślivaj mety — u jakaści rekłamy, kab pryciahnuć novych klijentaŭ», — śćviardžaŭ pradstaŭnik istca.
Alaksiej Vasileŭski, u svaju čarhu, rastłumačyŭ, što vykładvaje rašeńni zadač biaspłatna, kab abituryjenty, u jakich niama mahčymaści prajści płatnaje repietycyjnaje testavańnie, mahli zahadzia ŭbačyć, što ich čakaje na centralizavanym testavańni.
Adkazčyk taksama nastojvaŭ, što rašeńnie zadačy nie źjaŭlajecca vytvornym tvoram, jak zapeŭnivaŭ sud iściec. «Rašyć ža zadaču moža luby nastaŭnik, tut niama ŭnikalnych mietadaŭ i tvorčaha padychodu», — zajaviŭ Vasileŭski.
Administracyjny praces vioŭ sudzia Mikałaj Lipnievič. Jon staŭ na bok adkazčyka, bo nie ŭhledzieŭ u jaho dziejańniach parušeńnia zakona.
Rašeńnie suda moža być abskardžana na praciahu 10 dzion. Pradstaŭniki RIKV zajavili, što buduć padavać kasacyjnuju skarhu.
Kamientary