Rasijskaja presa: abo Biełaruś uvojdzie ŭ skład Rasii, abo jaje likvidujuć

Rasiejskaja dziełavaja hazeta «Vzhlad» apublikavała artykuł «Miensku para vyznačacca» z zaklikam da Alaksandra Łukašenki pravieści vosieńniu 2015 hodu referendum ab dałučeńni Biełarusi da Rasiei.

U advarotnym vypadku — «Biełaruś u ciapierašnim vyhladzie likvidujuć».

Aŭtar artykuła žurnalist Eduard Biraŭ adznačaje, što Łukašenku treba vyznačycca, z kim jon — z Rasiejaj abo Zachadam. Inačaj Biełaruś moža napatkać los Ukrainy:

«Ź Biełaruśsiu moža vyjści toje ž samaje i navat z toj ža kryvioju, kali kiraŭnictvam i narodam nia budzie vyrazna zrobleny vybar na karyść adnaho z bakoŭ — na karyść svajho doma ŭ ruskim śviecie. Pryčym vybar mienavita imperski i pryncypovy — nia prosta adsiedziecca ŭ kvatercy i bajacca pasvarycca z kožnym z bakoŭ, pry hetym navat padzarablajučy na sankcyjach suprać Rasiei, a ŭlicca ŭ Rasieju terytoryjaj i dušoj, ustać ź joj u adzin šycht, padzialić ź joj jaje ciažki kryž».

Jak piša hazeta «Vzhlad», «źbirańnie ruskich ziamiel» — heta «nia niejki kapryz Pucina, ale abjektyŭnaja nieabchodnaść».

«U hetaj suviazi adzina pravilny vychad ź ciapierašniaha stanovišča ŭ tym, kab Łukašenka, kali jon sapraŭdy patryjot Biełarusi i ruskaha śvietu, pravioŭ referendum ab dałučeńni da Rasiei razam z vybarami vosieńniu 2015 hodu i ŭžo ŭ zaležnaści ad voli naroda pryniaŭ histaryčnaje rašeńnie.

Rasiei treba, kab ruskija Biełarusi zrabili svoj vyrazny i pramy vybar, biaz hetaha ŭkrainskaha vichlańnia pamiž dvuma polusami. Vyjavi Łukašenka takuju inicyjatyvu, Biełaruś užo zimoj 2015 uvojdzie ŭ skład Rasiejskaj Federacyi na pravach admysłovaj aŭtanomii. Ale dla hetaha Alaksandru Ryhoraviču pryjdziecca admovicca ad svaich ambicyjaŭ jak kiraŭnika «suverennaj dziaržavy» — što, biezumoŭna, vielmi balučy momant dla luboha palityka, i tym bolš takoha daśviedčanaha i statusnaha.

Adnak alternatyva hetamu našmat bolš sumnaja: Biełaruś u ciapierašnim vyhladzie likvidujuć. Kali nia vosieńniu 2015 padčas vybaraŭ, to paźniej, ale Zachad prystupić da hetaha, zmušajučy Łukašenku albo zdać uładu, albo całkam padparadkavacca Zachadu», — piša rasiejskaje vydańnie.

Palityčny ahladalnik i medyjaekspert Alaksandar Kłaskoŭski ličyć, što panikavać u suviazi z padobnym artykułam nia treba, ale i ihnaravać padobnyja źjavy, biezumoŭna, nielha: biełarusam treba «trymać porach suchim».

«Treba adznačyć, što apošnim časam u rasiejskich medyjach padobnaha kštałtu materyjały peryjadyčna stali źjaŭlacca. Pakul nielha skazać, što heta niejki mejnstrym rasiejskaj prapahandy, ale tym nia mieniej nichto nie spyniaje aŭtaraŭ hetych artykułaŭ, pry tym, što, jak viadoma, Kreml siońnia kantraluje idealahičnuju, infarmacyjnuju sferu navat bolej žorstka, čym biełaruskija ŭłady.

Tamu ja dumaju, što hetaja tema, choć jana pakul nia ŭ fokusie, ale na ŭsialaki vypadak jana padtrymlivajecca. Tut, napeŭna, niejkaja praca i na rasiejskuju aŭdytoryju, ale aściarožnaja, tamu što ŭsio ž taki ŭ rasiejskaj hramady pieravažaje pakul što mierkavańnie, što biełarusy — braty (choć praktyka pakazvaje, što vielmi lohka pry intensiŭnaj prapahandzie pieratvaryć ich taksama ŭ «fašystaŭ» dy «banderaŭcaŭ» — prykład z Ukrainaj vielmi krasamoŭny). Ja dumaju, što tut moža być meta — troški panervavać i Łukašenku, kab jon byŭ bolej pasłuchmiany ŭ niejkich pytańniach (u tym ža ŭkrainskim pytańni, naprykład). Naahuł, viedajecie, heta takaja tema, jak toj bronieciahnik, jaki staić na zapasnym šlachu. Ja b nia kidaŭsia ŭ niejkija alarmisckija pradkazańni siońnia, ale dla tych, chto dbaje pra biełaruskuju niezaležnaść, heta jašče adzin napaminak pra toje, što va ŭsich sensach treba trymać porach suchim», zajaviŭ Kłaskoŭski ŭ interviju Radyjo Svaboda.

• 0
• 0
• 0
• 0
• 0
• 0
• 0
• 0