Dziaŭčaty z Bresta zapuścili biełaruskamoŭny kulinarny videabłoh
«Bieraściejskaja kucharačka» navučyć hatavać stravy ź pieršaj biełaruskaj kulinarnaj knihi.
Youtube-błoh «Bieraściejskaja kucharačka» vučyć hatavać smažaninu z kačak ci kaŭbasy ŭ pivie. Videa zdymajuć dźvie dziaŭčyny z Bresta, siostry Alena i Volha Tałatynik.
«Alena ź dziacinstva zachaplajecca kulinaryjaj. U dzieviać hadoŭ samastojna pryhatavała svaju pieršuju stravu – pončyki, — paspaviadaje Volha. — Mnie cikava zdymać i apracoŭvać videa. Časam moža zavitać chtoś ź siabroŭ, kab paŭdzielničać u kulinarnych ekśpierymientach».
Bolšaść videa na kanale pryśviečanaja receptam z «Litoŭskaj kucharki» — pieršaj biełaruskaj kulinarnaj knihi, ŭpieršyniu vydadzienaj u 1854 hodzie.
«Heta vielmi cikavy ekśpierymient — pryhatavać tahačasnyja stravy ŭ sučasnych umovach, — kaža Volha. — Nie kožny na heta advažycca, ale mnohim cikava, jakaja strava ŭ vyniku atrymajecca».
Dziaŭčaty płanujuć navučyć hledačoŭ i hatavańniu niekatorych sučasnych straŭ. Naprykład, siabry nakazali abaviazkova zrabić videa pra desiert tyramisu, jakim ich častuje Alena.
«Zvyčajna nie chapaje času, kab hatavać, tamu ŭ štodzionnym žyćci ježa bolš prostaja, — pryznajecca Volha. — Pielmieni z kramy moža i nie, jadzim bolš sałatki z harodniny dy sadavinu».
Alena i Volha płanujuć vykładvać videa kožny čaćvier da kanca hoda: «A tam užo pahladzim, kali budzie čas i natchnieńnie, to praciahniem».
Apracoŭka videa zajmaje zbolšaha niekalki hadzin, a voś sami zdymki — pa-roznamu.
«Zvyčajna Alena za stałom, a ja za kamieraj, — tłumačyć Volha. — Zrazumieła, što pa-za kadram my hatujem razam, kab paskoryć praces».
Dziaŭčaty narakajuć: siońnia brakuje nie tolki biełaruskamoŭnaha kantentu pra biełaruskuju kuchniu. U ich płanach i anhłamoŭnaje videa. «Kali jašče možna trapić na niejkija anhłamoŭnyja artykuły biełaruskich navukoŭcaŭ i daśledčykaŭ biełaruskaj kuchni, to ź videa ŭsio značna ciažej», — kaža Volha.
Na dumku Volhi, zamiežniki napraŭdu cikaviacca Biełaruśsiu i jaje tradycyjami, tamu anhłamoŭnyja videa ličać vartaj spravaj.
«My lubim padarožničać, choć i nie tak časta možam heta sabie dazvolić, — raspaviadaje Volha. — Padčas vandrovak razmaŭlajem ź ludźmi roznych krain. Vyśviatlajecca takaja tendencyja, što infarmacyja pra našu krainu vielmi abmiežavanaja. Ludziam cikava, jakija my, biełarusy, jakija ŭ nas admietnaści, asablivaści, čym adroźnivajemsia ad našych susiedziaŭ, jakija tradycyi, jak my žyviem, jakaja naša biełaruskaja muzyka i, kaniešnie, jakija našy biełaruskija stravy».
Viadoma, videa robiacca na čystym entuzijaźmie. «Moža, macioryja videabłohiery i zarablajuć niemałyja hrošy, ale nam pakul, a niejkich zarobkach havaryć nie prychodzicca», — śmiajecca Volha.
Hladzicie taksama:
«Naša strava»: hatujem łokšynu ź miodam i małakom
«Naša strava»: zasvoj łapuny za 2 chviliny
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?83
Kamientary