MZS: «Realizacyja zakonu ŭ jaho ciapierašniaj redakcyi zdolna surjozna destabilizavać mižnacyjanalnyja adnosiny ŭ našaj krainie».
Biełaruś prapanavała ŭvieści maratoryj na prymianieńnie zakona «Kartka palaka» adnosna biełaruskich hramadzian. Ab hetym było zajaŭlena 7lutaha na biełaruska‑polskich kansultacyjach u Ministerstvie zamiežnych spraŭ Biełarusi, paviedamiŭ BIEŁTA pres‑sakratar MZS Andrej Papoŭ.
Pavodle jaho słoŭ, biełaruski bok vykazaŭ surjoznuju zakłapočanaść u suviazi z tym, što hety zakon, jaki niepasredna zakranaje intaresy niekatorych katehoryj hramadzian Respubliki Biełaruś, byŭ pryniaty ŭ Polščy bieź jakich‑niebudź papiarednich kansultacyj z našaj dziaržavaj. Pry hetym, padkreśliŭ Andrej Papoŭ, prapanovy ab praviadzieńni takich kansultacyj nieadnarazova vykazvalisia biełaruskim bokam.
Respublika Biełaruś asobna akcentavała ŭvahu polskaha boku na tym, što realizacyja zakona ŭ jaho ciapierašniaj redakcyi zdolna surjozna destabilizavać mižnacyjanalnyja adnosiny ŭ našaj krainie, vyklikać napružanaść u biełaruskim hramadstvie, parušyć jaho stabilnaść i sparadzić niedavier pamiž biełaruskimi hramadzianami roznych nacyjanalnaściej. Dla pieravodu dyjałoha ŭ kanstruktyŭnaje rečyšča biełaruski bok prapanavaŭ polskim kaleham vyjści z sumiesnym zvarotam u kampietentnyja mižnarodnyja struktury, uklučajučy Vieniecyjanskuju kamisiju Savieta Jeŭropy, z prośbaj ab praviadzieńni niezaležnaj jurydyčnaj ekśpiertyzy zakona «Kartka palaka» na pradmiet jaho adpaviednaści mižnarodnym normam. Da atrymańnia takoha zaklučeńnia Biełaruś prapanavała ŭvieści maratoryj na prymianieńnie zakona. Biełaruski bok zaprasiŭ Polšču da pradaŭžeńnia dyjałoha pa hetym pytańni i vykazaŭ nadzieju, što polski bok prymie vykazanyja prapanovy.
Na kansultacyjach biełaruski bok zasiarodziŭ taksama ŭvahu polskich kaleh na prablemach, ź jakimi sutykajucca hramadzianie našaj krainy pry zvarocie pa vizy ŭ konsulskija ŭstanovy Polščy paśla jaje ŭstupleńnia ŭ zonu dziejańnia Šenhienskaha pahadnieńnia. Heta datyčycca i nievykanańnia ŭzhodnienych terminaŭ razhladu vizavych zajavak, najaŭnaści admoŭ u vydačy viz, čerhaŭ kala konsulskich ustanoŭ Polščy.
Baki abmianialisia prajektami pahadnieńniaŭ ab sproščanym paradku pierasiačeńnia hranicy žycharami pryhraničnych rajonaŭ dźviuch krain, što pavinna ablahčyć transhraničnaje supracoŭnictva pamiž Biełaruśsiu i Polščaj, paviedamiŭ Andrej Papoŭ.
Ciapier čytajuć
Biełarus palacieŭ u Nicu praz Stambuł — ciapier jon u komie ŭ francuzskaj balnicy. Miascovyja miedyki rajać adklučać jaho6
Kamientary