Da 24 hadoŭ pazbaŭleńnia voli pryhavorany žychar Łuninca za zabojstva žonki i cieščy
9 vieraśnia sudovaja kalehija pa kryminalnych spravach Bresckaha abłasnoha suda na vyjaznym pasiadžeńni ŭ Łunincy vyniesła prysud 43-hadovamu miascovamu žycharu, jaki zabiŭ žonku i ciešču.
Jak paviedamiŭ BiełaPAN namieśnik načalnika adździeła prakuratury Bresckaj vobłaści Alaksandr Žeška, jaki padtrymlivaŭ dziaržaŭnaje abvinavačańnie, 23 studzienia pryblizna ŭ 21.00 mužčyna pryjšoŭ damoŭ niećviarozym i pahražaŭ žoncy zabojstvam, demanstrujučy nož. Zatym jon pajšoŭ, praz hadzinu viarnuŭsia ź biejsbolnaj bitaj i znoŭ pahražaŭ zabić žonku. Nočču jaho doma nie było. Ranicaj 24 studzienia mužčyna ŭziaŭ u svaim aŭtamabili palaŭničuju strelbu i prykładna ŭ 7.30 zajšoŭ u kvateru. U prychožaj jon ubačyŭ žonku i jaje maci.
Spačatku mužčyna streliŭ u ciešču, zatym u žonku, jakaja paśpieła vybiehčy na leśvičnuju placoŭku. Abiedźvie žančyny pamierli na miescy zdareńnia.
Sudovaja kalehija pa kryminalnych spravach Bresckaha abłasnoha suda pryznała mužčynu vinavatym u pahrozie zabojstvam (art. 186 KK), zabojstvie dźviuch asob (p. 1 č. 2 art. 139 KK) i pryhavaryła da 24 hadoŭ pazbaŭleńnia voli ŭ kałonii ŭzmocnienaha režymu. U vyhladzie kampiensavańnia maralnaha ŭronu ź jaho spahnana 200 młn. rubloŭ na karyść cieścia.
«U sudovym pasiadžeńni abvinavačany svajoj viny nie pryznaŭ, zajaŭlajučy, što nie pahražaŭ zabojstvam žoncy i streliŭ u jaje i ciešču z-za nieaściarožnaści», — paviedamiŭ Žeška.
Raniej mužčyna sudzimy nie byŭ, pryciahvaŭsia da administracyjnaj adkaznaści, u tym liku jak siamiejny skandalist.
Prysud jašče nie nabyŭ zakonnuju moc i moža być abskardžany.
Jak raniej paviedamlaŭ BiełaPAN, u siamiejnaj pary dvoje dziaciej: 18-hadovaja dačka, jakaja žyvie asobna ad baćkoŭ, i 12-hadovy syn. U momant zabojstva chłopčyk hulaŭ na vulicy z sabakam.
Kamientary