Bialacki i Litvina abmierkavali situacyju z pravami čałavieka ŭ Biełarusi z pradstaŭnikami ES
Pradstaŭniki biełaruskaj hramadzianskaj supolnaści prapanoŭvajuć ES nie źnižać uzrovień manitorynhu situacyi z pravami čałavieka ŭ Biełarusi i praciahvać u suviazi z hetym nacisk na aficyjny Minsk. Situacyja z pravami čałavieka abmiarkoŭvałasia padčas vizitu ŭ Brusiel staršyni zakrytaha ŭładami pravaabarončaha centra «Viasna» Alesia Bialackaha i vice-staršyni Biełaruskaj asacyjacyi žurnalistaŭ Žanny Litvinoj 2—3 lutaha.
Bialacki i Litvina sustrelisia z namieśnikam hienieralnaha sakratara Jeŭrapiejskaj słužby źniešnich dziejańniaŭ Chielhaj Šmid, śpiecyjalnym pradstaŭnikom ES pa pravach čałavieka Staŭrasam Łambrynidysam, pasłami jeŭrapiejskich krain pry ES pa palityčnych pytańniach i pytańniach biaśpieki, a taksama inšymi pradstaŭnikami Jeŭrasajuza, jakija zajmajucca prablematykaj pravoŭ čałavieka.
«Biełaruskija pravaabaroncy adznačyli, što paśla vyzvaleńnia ŭ žniŭni 2015 hoda palityčnych źniavolenych nijakich inšych pazityŭnych źmienaŭ u śfiery pravoŭ čałavieka i demakratyi ŭ Biełarusi nie adbyłosia, a prezidenckija vybary ŭ kastryčniku prajšli ź vialikimi parušeńniami i falsifikacyjami», — paviedamlaje pravaabarončy sajt spring96.org.
Bialacki i Litvina źviarnuli ŭvahu surazmoŭcaŭ na ihnaravańnie ŭładami adkrytaha zvarotu pravaabaroncaŭ ad 9 śniežnia. U im prapanoŭvałasia nieadkładna pačać praces demakratyčnych pieramienaŭ u krainie: spynić palityčny pieraśled apazicyjnych aktyvistaŭ, pačać rehistracyju hramadskich arhanizacyj i palityčnych partyj biez cenzury, stvaryć biaśpiečnyja ŭmovy viartańnia ŭ krainu palituciekačoŭ, spynić pieraśled niezaležnych žurnalistaŭ i demakratyčnych ŚMI, uvieści maratoryj na śmiarotnaje pakarańnie.
Na dumku pradstaŭnikoŭ hramadzianskaj supolnaści, prablemy z pravami čałavieka i demakratyjaj u Biełarusi praciahvajuć nasić sistemny charaktar: adznačajecca nacisk na aktyvistaŭ i žurnalistaŭ, vynosiacca novyja śmiarotnyja prysudy i admovy ŭ rehistracyi hramadskich arhanizacyj.
Bialacki i Litvina zaklikali ES pryniać i apublikavać płan «pieršačarhovych čakanych ad uładaŭ Biełarusi mier, nakiravanych na prahres u śfiery pravoŭ čałavieka ŭ krainie», a taksama ŭzhadnić ź imi «darožnuju kartu» pa vykanańni hetaha płana.
U paviedamleńni adznačajecca, što vizit Litvinoj i Bialackaha ŭ Brusiel prachodzić niezadoŭha da pryniaćcia Jeŭrasajuzam rašeńnia ab sankcyjach suprać biełaruskich čynoŭnikaŭ, adkaznych za parušeńni pravoŭ čałavieka i falsyfikacyi na vybarach. «Pradstaŭniki Jeŭrasajuza i pasły krain ES zapeŭnili biełaruskich pravaabaroncaŭ, što, niahledziačy na toje, jakoje rašeńnie budzie pryniataje pa sankcyjach, uvaha da Biełarusi z boku Jeŭrasajuza nie pamienšycca, što demakratyčnyja svabody i pravy čałavieka buduć zastavacca pryjarytetnymi pytańniami ŭ adnosinach ES i Biełarusi», — padkreślivaje pravaabarončy resurs.
Dziejańnie vizavych i ekanamičnych sankcyj u dačynieńni da 171 fizičnaha i 10 jurydyčnych asobaŭ Biełarusi było prypynienaje 31 kastryčnika 2015 hoda na čatyry miesiacy ŭ adkaz na vyzvaleńnie ŭsich palitviaźniaŭ i «ŭ kantekście palapšeńnia adnosin pamiž ES i Biełaruśsiu». Da kanca lutaha ES pavinien vyznačycca z nahody dalejšaha losu abmiežavalnych mier. Jak paviedamili ŭ pres-słužbie Rady ES, pytańnie pa Biełarusi budzie razhladacca 15 lutaha Radaj ES pa zamiežnych spravach.
Miž tym biełaruskaje MZS nieadnarazova zajaŭlała, što ŭ Minsku raźličvajuć na poŭnuju admienu sankcyj.
Kamientary