Ministr ŽKH nazvaŭ pryčyny padaražeńnia studzieńskaj «kamunałki»
Ministr ŽKH nazvaŭ try pryčyny rostu koštu žyllova-kamunalnych pasłuh u studzieni i adznačyŭ, što pa ŭsich faktach niapravilnaha prymianieńnia taryfaŭ buduć praviedzieny pieraraźliki. Pra heta Alaksandr Cierachaŭ zajaviŭ u intervju prahramie «Hałoŭny efir» na telekanale «Biełaruś 1».
Jon patłumačyŭ, što košt žyllova-kamunalnych pasłuh u studzieni padaražeŭ adrazu pa niekalkich pryčynach.
«Adbyłosia pavieličeńnie taryfaŭ na žyllova-kamunalnyja pasłuhi. Padzieł funkcyj u žyroŭkach: z pasłuhi «techničnaje absłuhoŭvańnie» byli vydzielenyja ŭborka i aśviatleńnie dapamožnych pamiaškańniaŭ — padjezdaŭ. Akramia taho, studzień byŭ chaładniejšy za śniežań na 9 hradusaŭ, što adbiłasia na kolkaści spažytaj ciepłavoj enierhii», — rastłumačyŭ jon.
Ministr ŽKH taksama adznačyŭ, što ŭ studzieńskich žyroŭkach sustrakalisia techničnyja pamyłki i nieabhruntavanaje pavyšeńnie koštu pasłuh.
«Pa ŭsich faktach, dzie budzie vyjaŭlena niapravilnaje prymianieńnie taryfaŭ, pa ŭsich faktach pieranaličeńnia buduć praviedzieny pieraraźliki», — adznačyŭ Alaksandr Cierachaŭ.
Jon padkreśliŭ, što ŭ sakavickaj žyroŭcy ludzi ŭbačać hetyja pieraraźliki.
Pra toje, što ličby ŭ žyroŭkach pamienšacca, kazaŭ i staršynia KDK Leanid Anfimaŭ. Jon taksama raspavioŭ, što kryminalnyja spravy pa faktach nieabhruntavanaha zavyšeńnia zaviedzienyja ŭ dačynieńni da roznych śpiecyjalistaŭ — ad supracoŭnikaŭ Ministerstva žyllova-kamunalnych pasłuh da śpiecyjalistaŭ na miescach.
Kamientary