Złačynnaj hrupaj pa raspaŭsiudžvańni narkotykaŭ u Minsku kiravała 23-hadovaja dziaŭčyna
U Minskim haradskim sudzie 1 sakavika praciahvajecca praces pa samaj hučnaj za apošni čas spravie ab raspaŭsiudžvańni narkotykaŭ.
Dziaržabvinavačańnie pradstaŭlaje prakuror Aleh Bujlankoŭ, staršyniuje ŭ pracesie sudździa Siarhiej Chrypač. Hałoŭny fihurant pa spravie — 31-hadovy minčanin Kanstancin Viluha.
Na łavie padsudnych — 17 čałaviek, u tym liku dva supracoŭniki KDB, były supracoŭnik milicyi i dźvie dziaŭčyny. Adna ź ich, Alina Cierahiera 1991 hoda naradžeńnia, pa viersii śledstva, stvaryła ŭ Minsku złačynnuju hrupu pa raspaŭsiudžvańni narkotykaŭ.
Dziaržabvinavaŭca paviedamiŭ, što Cierahiera była ŭciahnutaja ŭ złačynnuju dziejnaść u 2012 hodzie. Mienavita jana stvaryła ŭ Minsku arhanizavanuju złačynnuju hrupu (AZH) pa raspaŭsiudžvańni narkotykaŭ i kiravała joju. U jaje abaviazki ŭvachodziła raźmierkavańnie abaviazkaŭ pamiž udzielnikami AZH, rehulavańnie koštaŭ, rekłama ŭ internecie, upakoŭka narkotyku, ahulnaje administravańnie dziejnaści.
Udzielniki hrupy šyfravali svaju pierapisku, a ŭ apošni čas vykarystoŭvali tolki anłajn-płaciažy.
U červieni 2014 hoda pravaachoŭniki paviedamili, što ŭ Minsku ŭ domie na praśpiekcie Dziaržynskaha zatrymanaja 23-hadovaja dziaŭčyna, jakaja arhanizavała handal novym na toj čas dla Biełarusi narkotykam.
Napeŭna, havorka išła mienavita pra Alinu Cierahieru. U arandavanaj kvatery i ŭ aŭtamabili pravaachoŭniki tady vyjavili niekalki kiłahramaŭ zabaronienych rečyvaŭ, a taksama pačak bankaŭskich kartak, try kanvierty z hrašyma, sšytak z buchhałteryjaj, noŭtbuk ź pierapiskaj i ściah Rasii.
Cierahiera, pavodle słoŭ prakurora, taksama ŭdzielničała ŭ stvareńni filijałaŭ «biźniesu» Viluhi ŭ Rasii. U Maskvie AZH uznačalvaŭ niejki Rybko. Viadoma, što jon zatrymany. Vyrašajecca pytańnie ab jaho pieradačy ŭ Biełaruś. Paźniej złačynnuju hrupu ŭ Rasii ŭznačaliŭ Fiodar Buchaviec, jaki zaraz prachodzić abvinavačanym pa nazvanaj kryminalnaj spravie.
Jak raniej paviedamlałasia, Viluha ŭ studzieni 2011 hoda stvaryŭ sajt LegalMinsk z metaj raspaŭsiudžvańnia narkatyčnych i psichatropnych rečyvaŭ. Pa viersii śledstva, jon załučyŭ u złačynnuju dziejnaść bolšaść z tych, chto siońnia razam ź im znachodzicca na łavie padsudnych, u tym liku supracoŭnikaŭ pravaachoŭnych orhanaŭ.
Ciapier čytajuć
Staŭ viadomy prysud eks-pamočniku Łukašenki Iharu Bryło2
Kamientary