Marat Junusaŭ źbirajecca padavać u sud na rasijskija ŚMI

«Ja nie mahu apisać heta pačućcio. Abvinavačvajuć u hibieli ludziej, relihijnym fanatyźmie, nieciarpimaści… Heta byŭ šok», - zajaviŭ u intervju telekanału ANT Marat Junusaŭ, adzin z troch hramadzian Biełarusi, jakija pa viersii rasiejskich ŚMI, datyčnyja da teraktaŭ u Bruseli 22 sakavika.

Siužet byŭ pakazany ŭviečary 26 sakavika ŭ prahramie «Našy naviny». Ź Junusavym razmaŭlali, kali jon uskładaŭ kvietki, addajučy daninu pamiaci zahinuŭšym u vyniku terarystyčnych napadaŭ.

«Ja źviarnuŭsia ŭ palicyju, ja žyvu pa susiedstvie z palicejskim učastkam, pakazaŭ biełaruski pašpart, pakazaŭ dazvoł na žycharstva ŭ Bielhii. Jany ŭsio pravieryli. Heta zaniało dźvie-try hadziny. Skazali, što nichto ničoha nie adpraŭlaŭ… Nijakich abvinavačvańniaŭ suprać vas nie pradjaŭlena. Ja skazaŭ, što ja adkryty dla luboha rasśledavańnia, ja žyvu pobač», — raspavioŭ Marat Junusaŭ.

Junusaŭ choča źviarnucca ŭ sud, kab damahčysia aficyjnaha abviaržeńnia infarmacyi, raspaŭsiudžanaj adnosna jaho dačynieńnia da teraktaŭ.

Nahadajem, niekalki dzion tamu KDB Biełarusi aficyjna zajaviŭ, što jak minimum jašče adzin ahučany rasijskimi ŚMI «padazravany» ŭ datyčnaści da teraktaŭ, 22 maja znachodziŭsia nie Bruseli, a ŭ Homieli.

Naohuł havorka išła pra bratoŭ Ivana i Alaksieja Doŭbašaŭ, a taksama Marata Junusava.

«Nam dakładna viadoma, što na momant ździajśnieńnia teraktaŭ Alaksiej Doŭbaš znachodziŭsia ŭ Homieli, - zajaviŭ načalnik pres-słužby KDB Dźmitryj Pabiaržyn. - Pryčym ab svaim vyjeździe ŭ Biełaruś jon zahadzia prainfarmavaŭ bielhijskuju palicyju. A daviedaŭšysia ź internetu infarmacyju, jakaja ŭ dačynieńni da jaho z bratam raspaŭsiudžvajecca, paprasiŭ brata Ivana rastłumačycca ŭ antyterarystyčnych padraździaleńniach Bielhii, što toj i zrabiŭ».

«Takim čynam, my možam peŭna śćviardžać, što Alaksieja Doŭbaša na momant ździajśnieńnia teraktaŭ u Bielhii nie było», - kanstatavaŭ Pabiaržyn.

Pytańnie ab tym, dzie znachodzilisia ŭ hety momant Ivan Doŭbaš i Junusaŭ, jon pieraadrasavaŭ bielhijskim specsłužbam.

Adnosna asob, nazvanych u rasijskich ŚMI, Pabiaržyn adznačyŭ, što hetyja ludzi znachodziacca ŭ poli zroku Kamiteta dziaržaŭnaj biaśpieki z 2014 hoda. Z 2015 hoda ich pravierka viałasia sumiesna z FSB Rasii.

«Ustanoŭlena, što dvoje ź ich na samoj spravie źjaŭlajucca hramadzianami Respubliki Biełaruś, a adzin źjaŭlajecca vychadcam z Rasijskaj Fiederacyi. Razam z tym, dadzienych, jakija paćviardžajuć ich uzajemasuviaź, na siońniašni dzień u Kamiteta dziaržaŭnaj biaśpieki niama», - zajaviŭ Pabiaržyn.

Pavodle infarmacyi KDB, braty Doŭbašy - Alaksiej u 12-hadovym uzroście i Ivan u 7-hadovym uzroście - razam z maci ŭ 2000 hodzie vyjechali ŭ Bielhiju, dzie i vychoŭvalisia. U 2006 hodzie Alaksiej skončyŭ škołu ŭ Lježy, pajšoŭ na siekcyju boksu, dzie i paznajomiŭsia z prychilnikami isłamu. Paśla pad ich upłyvam jon taksama pryniaŭ isłam i na pieršapačatkovym etapie pastajanna naviedvaŭ miačeć. Pa najaŭnaj infarmacyi, u apošni čas miačeć jon nie naviedvaje, a molicca doma.

«Taksama my majem infarmacyju ab tym, što ŭ 2013 hodzie jon paznajomiŭsia z vychadcam ź Sierbii, jaki paśla vyjechaŭ na vajnu ŭ Siryju. U 2014 hodzie pryblizna paŭtara miesiaca znachodziŭsia z metaj pošuku pracy na terytoryi Turcyi. Za parušeńnie tureckaha zakanadaŭstva byŭ vysłany nazad u Bielhiju», - raspavioŭ pradstaŭnik KDB.

KDB maje dadzienyja ab tym, što braty pieryjadyčna naviedvali Biełaruś.

Što tyčycca Marata Junusava, dyk jon ad 1990 hoda žyŭ u Biełarusi, u Hrodzienskaj vobłaści, u 1999 hodzie vyjechaŭ na pastajannaje miesca žycharstva ŭ Bielhiju. U 2008 hodzie pryniaŭ paddanstva Karaleŭstva Bielhija. «Z hetaha času my majem dadzienyja pra piać naviedvańniaŭ im Biełarusi. Apošni raz jon byŭ tut u 2011 hodzie», - skazaŭ Pabiaržyn.

Jon zajaviŭ, što ŭ śniežnia 2015 hoda infarmacyja pra bratoŭ Doŭbašaŭ i Junusava była pieradadziena ŭ FSB Rasii z prapanovaj ab pieradačy jaje pravaachoŭnym orhanam Bielhii, ź jakimi KDB Biełarusi kantaktaŭ nie padtrymlivaje. Ci pieradadziena hetaja infarmacyja pa pryznačeńni, u Minsku nieviadoma.

• 0
• 0
• 0
• 0
• 0
• 0
• 0
• 0