Abvinavačany pa «spravie 17» byŭ pieraviedzieny ŭ «pres-kamieru» i ŭskryŭ vieny paśla pahrozaŭ
Kanstancin Viluha pa mianušcy «Kot», abvinavačany ŭ stvareńni najbujniejšaj u Biełarusi złačynnaj arhanizacyi, jakaja zajmałasia raspaŭsiudžvańniem spajsaŭ, zrabiŭ hučnuju zajavu ŭ sudzie.
Padčas pasiedžańnia 31 sakavika jon zapatrabavaŭ zabiaśpiečyć biaśpieku svaim zmoŭščykam. Viluha vystupiŭ sa zvarotam da Alaksandra Łukašenki i staršyni KDB Valeryja Vakulčyka i paprasiŭ spynić «pravavoje biezhraničča, jakoje ździajśniajuć Hałoŭnaje upraŭleńnie pa baraćbie z arhanizavannaj złačynnaściu (HUBAZik) MUS i Hałoŭnaje śledčaje ŭpraŭleńnie Śledčaha kamiteta».
Pavodle słovaŭ Viluhi, na abvinavačanych akazvajecca rozny cisk, a taksama isnuje pahroza ich žyćcia i zdaroŭja. Kot paviedamiŭ, što 30 sakavika abvinavačany pa hetaj ža spravie Dźmitryj Haŭryk byŭ pieraviedzieny ŭ tak zvanuju «pres-kamieru», u jakoj jamu «pieradali pryvitańnie ad HUBAZiK», papiaredziŭšy, što kali jon aśmielicca admovicca ad patrebnych śledstvu pakazańniaŭ, to žyć jon nie budzie.
«Haŭryku nie davali spać usiu noč, pahražali raspravaj z boku HUBAZiK MUS. Da ranicy jon, nie vytrymaŭšy cisku, chacieŭ skončyć žyćcio samahubstvam — uskryŭ sabie vieny, i tolki cudam jaho ŭdałosia vyratavać», - paviedamiŭ Viluha.
U kancy vystupu abvinavačvany, vidavočna, źviartajučysia da Alaksandra Łukašenki, paprasiŭ jaho zabiaśpiečyć biaśpieku ŭdzielnikaŭ pracesu i «uziać pad svoj kantrol abjektyŭnaść sudovaha śledstva».
Uśled za Viluham vystupiŭ Dźmitryj Haŭryk, jon znachodziŭsia ŭ susiedniaj kletcy ź pieraviazanym zapiaściem levaj ruki.
Kamientary