Historyja pad spajsam: homielskich studentaŭ vykrali nieviadomyja ŭ maskach
U toj viečar žychary homielskaj šmatpaviarchoŭki vyklikali milicyju. Pryčynaj ich turboty stali padletki, jakija vielmi mocna šumieli ŭ padjeździe.
Kali pravaachoŭniki pryjechali, na leśvičnaj placoŭcy apošniaha paviercha lažali dvoje źbitych chłopcaŭ. Pobač valalisia narkotyki. Ale chłopcy zapeŭnivali, što tut ni pry čym i naohuł jany paciarpiełyja. Nibyta ich vykrali nieviadomyja ŭ maskach. Pavieźli na čornym džypie ad budynka ŭniviersiteta, pryvieźli ŭ nieznajomy padjezd, źbili, a potym padkinuli narkotyki.
Studenty-druhakurśniki nastojliva prytrymlivalisia ŭłasnaj viersii, ale paśla śledčaha ekśpierymientu pryznalisia. Akazałasia, što ŭ padjezd šmatpaviarchoŭki jany zabryli, kab užyć spajs. Praz damafon dźviery adkryli sami žychary. Chłopcy padnialisia na apošni pavierch. Dźviery na techpavierch byli nie začynieny, i studenty ŭładkavalisia na leśvičnaj placoŭcy. Adurmanienyja, jany stali hučna śmiajacca, ustavali na nohi i padali, bilisia ab ścieny. Adsiul i siniaki na ich ciełach i tvarach.
Jak raspavioŭ starejšy śledčy 1-ha śledčaha adździaleńnia Homielskaha haradskoha adździeła Śledčaha kamiteta Śviatasłaŭ Litvinaŭ, kryminalnaja sprava pieradadziena ŭ sud. Adnaho studenta abvinavačvajuć u zachoŭvańni narkotykaŭ, druhoha za ŭžyvańnie spajsaŭ pryciahnuć da administracyjnaj adkaznaści.
Kamientary