Orhany dziaržkiravańnia pavinny aktyvizavać pracu pa dałučeńni Biełarusi da Suśvietnaj handlovaj arhanizacyi (SHA). Rasparadžeńnie ab hetym padpisaŭ premjer-ministr Andrej Kabiakoŭ 6 krasavika.
Jak paviedamlaje pres-słužba ŭrada, dakumient pryniaty z metaj vykanańnia daručeńnia prezidenta, dadzienaha padčas narady 29 sakavika 2016 hoda, ab aktyvizacyi pieramoŭnaha pracesu pa dałučeńni Respubliki Biełaruś da SHA pry biezumoŭnym zachavańni nacyjanalnych intaresaŭ.
Členstva ŭ SHA razhladajecca jak instrumient pahłybleńnia intehracyi ŭ šmatbakovuju handlovuju sistemu, aptymizacyi struktury źniešniaha handlu, a taksama ŭ jakaści dadatkovaha stymułu dla ekanamičnaha rostu Biełarusi.
Kiraŭnikam respublikanskich orhanaŭ dziaržkiravańnia i inšych dziaržarhanizacyj, padparadkavanych uradu, daručana aktyvizavać pracu pa dałučeńni Biełarusi da SHA, a taksama zrabić zachady pa ŭzmacnieńni ekśpiertna-kadravaha patencyjału pa pytańniach, źviazanych z asnoŭnymi napramkami adpaviednych pieramovaŭ.
Ahulnuju kaardynacyju pieramoŭnaha pracesu budzie ažyćciaŭlać MZS, jakoje musić unieści ŭ Saŭmin prapanovy pa składzie pieramoŭnaj delehacyi, kandydatury jaje kiraŭnika i jaho namieśnikaŭ.
Akramia hetaha, MZS daručana raspracavać prajekt płana mierapryjemstvaŭ pa zabieśpiačeńni pieramoŭnaha pracesu pa dałučeńni da SHA na 2016 hod.
Nahadajem, praces dałučeńnia Biełarusi da SHA doŭžycca ŭžo bolš za 20 hadoŭ. Pry hetym u Minsku nieadnarazova stavili pad sumnieŭ metazhodnaść ŭstupleńnia ŭ arhanizacyju.
Zajaŭka na ŭstupleńnie ŭ SHA była padadzienaja Biełaruśsiu ŭ 1993 hodzie. U červieni 2009-ha Biełaruś, Kazachstan i Rasija raptoŭna abjavili, što prypyniajuć dvuchbakovyja pieramovy ab ustupleńni ŭ SHA i buduć vieści kansultacyi na pradmiet ustupleńnia ŭ arhanizacyju adzinaj mytnaj terytoryjaj. Adnak praź niekalki miesiacaŭ try krainy adnavili dvuchbakovyja pieramovy pa dałučeńni da SHA paasobku. U vyniku Rasija stała členam SHA ŭ žniŭni 2012 hoda, Kazachstan — u listapadzie 2015 hoda.
U kastryčniku 2012 hoda Łukašenka zajaŭlaŭ, što vostraja nieabchodnaść dałučeńnia Biełarusi da SHA adpała paśla ŭstupleńnia tudy Rasii.
Łukašenka taksama źviartaŭ uvahu na palityčny aśpiekt prablemy: «My praviali pieramovy, ale natyknulisia na palityčny płot. Nam kažuć, što heta čysta handlovaja, ekanamičnaja arhanizacyja — Suśvietnaja handlovaja arhanizacyja. Ničoha padobnaha. Palityka tut pieravažaje. I palityčny płot hety vybudavali pierad nami Jeŭrasajuz i Złučanyja Štaty Amieryki pa viadomych vam pryčynach: u nas niama pravoŭ čałavieka, u nas apošni apłot dyktatury tam i hetak dalej i da taho padobnaje».
Kamientary