Viarchoŭny sud pakinuŭ u sile śmiarotny prysud Hienadziu Jakavickamu

Viarchoŭny sud Biełarusi pakinuŭ u sile śmiarotny prysud žycharu Vilejki Hienadziu Jakavickamu. Takoje rašeńnie pryniataje 8 krasavika kalehijaj pa kryminalnych spravach Viarchoŭnaha suda pavodle vynikaŭ razhladu skarhi Jakavickaha.

Pavialičyć

5 studzienia 2016 hoda 48-hadovy Jakavicki byŭ pryznany vinavatym u žorstkim zabojstvie sužycielki i Minskim abłasnym sudom pryhavorany da vyklučnaj miery pakarańnia. Zhodna ź viersijaj śledstva, jon nanios pryblizna 46 udaraŭ žančynie, z-za čaho taja pamierła na miescy złačynstva. Kanflikt zdaryŭsia na hlebie reŭnaści. I Jakavicki, i zahinułaja znachodzilisia ŭ stanie ałkaholnaha apjanieńnia. Pavodle słoŭ abvinavačanaha, napiaredadni jany vypili niekalki butelek harełki.

Jakavicki pryznaŭ, što nanios nie bolš za piać udaraŭ, adnak śviedki ŭ sudzie pieršaj instancyi zajaŭlali, što bačyli, jak jon udaryŭ paciarpiełuju 10-12 razoŭ. Abvinavačany taksama nastojvaje, što ŭ jaho nie było matyvu na zabojstva. Jon ličyć, što sužycielka zahinuła pa vinie inšaha čałavieka, asoba jakoha sudom i śledstvam nie ŭstanoŭlenaja.

Advakat Volha Kramko źviarnuła ŭvahu na toje, što sud nienaležnym čynam vyvučyŭ materyjały ekśpiertyzy, zhodna ź jakoj pad paznohciami zabitaj byŭ znojdzieny bijałahičny materyjał nie tolki Jakavickaha, ale i inšaj, nieŭstanoŭlenaj, asoby mužčynskaha połu. Akramia taho, na miescy złačynstva nie znajšli adzieńnia sužycielki abvinavačanaha.

Charakterna, što ŭ pačatku 1990-ch hadoŭ Jakavickaha ŭžo pryhavorvali da śmiarotnaha pakarańnia, ale tady vyklučnaja miera była zamienienaja jamu na 15 hadoŭ pazbaŭleńnia voli — maksimalny na toj momant termin źniavoleńnia.

Zaraz za zabojstva pry abciažarvalnych abstavinach akramia śmiarotnaha pakarańnia praduhledžanaje pazbaŭleńnie voli da 25 hadoŭ i pažyćciovaje źniavoleńnie.

Jakavicki byŭ sudzimy piać razoŭ: dvojčy za zabojstva, a taksama za hrupavoje zhvałtavańnie, naniasieńnie lohkich i ciažkich cialesnych paškodžańniaŭ, niavypłatu alimientaŭ.

«Pakarańnie ŭ vyhladzie pazbaŭleńnia voli hetuju asobu ŭžo nie vypravić, — zajaviła ŭ sudzie dziaržabvinavaŭca. — Jak by sumna heta ni było, ale ŭ hetym vypadku śmiarotnaja kara źjaŭlajecca spraviadlivym pakarańniem». Advakat ža miarkuje, što, uličvajučy najaŭnaść nie vyśvietlenych akaličnaściaŭ pa hetaj spravie, vyklučnaja miera pakarańnia da jaje padabaronnaha nie moža być prymienienaja. Viarchoŭny sud paličyŭ arhumienty abvinavačańnia bolš pierakanaŭčymi, pakinuŭšy ŭ sile prysud ab vyklučnaj miery pakarańnia.

U Jakavickaha jość prava źviarnucca z prośbaj ab pamiłavańni na imia prezidenta, a taksama ŭ Kamitet AAN pa pravach čałavieka.

Nahadajem, 29 sakavika Viarchoŭny sud Biełarusi pakinuŭ u sile jašče adzin śmiarotny prysud — žycharu Lidskaha rajona Hrodzienskaj vobłaści Ivanu Kulašu.

Biełaruś zastajecca adzinaj u Jeŭropie krainaj, dzie da hetaha času prymianiajecca śmiarotnaje pakarańnie. Z momantu niezaležnaści krainy da rasstrełu byli pryhavoranyja bolš za 400 čałaviek, prezident pamiłavaŭ ź ich liku tolki adnaho asudžanaha. Paśla vyniasieńnia kožnaha śmiarotnaha prysudu Rada Jeŭropy, Jeŭrasajuz i pravaabarončyja arhanizacyi zaklikajuć biełaruskija ŭłady admovicca ad prymianieńnia śmiarotnaha pakarańnia i abviaścić maratoryj na hety vid pakarańnia.

• 0
• 0
• 0
• 0
• 0
• 0
• 0
• 0